Shillong, Nohprah, 08: Ka North East Students’ Organization (NESO) ka la pynbna kum ka sngi badum ne ka Black Day ha baroh ki Jylla ka thaiñ Shatei Lammihngi ka ri India ha ka 11 tarik mynta u bnai kum ka jingpyrshah ïa ka Citizenship (Amendment) Act, 2019, kaba long ka jingleh bym hok pyrshah ïa ki riewlum ritpaid jong kane ka thaiñ.
Ha u kyrwoh ba la phah ha ka sngi Thohdieng, u Chairman jong ka NESO u Bah Samuel B. Jyrwa u la ong ba ka NESO ka kwah ban pynkynmaw biang ïa ki paidbah jong ka thaiñ Shatei Lammihngi baroh kawei ba ha ka 11 tarik, Nohprah 2019, wat hapdeng ka jingpyrshah kaba jur jong ki riewlum ritpaid ka thaiñ Shatei Lammihngi ïa ka Citizenship (Amendment) Bill 2019, ka Sorkar India kam shym la shah skhor satia bad khatduh ïawai lyngba ka Rajya Sabha la mynjur ïa kane ka Aiñ Ïakjakor kaba la tip kum ka Citizenship (Amendment) Act 2019.
“Kum ka jingïaibteng ban ñiew ïa kane ka sngi kum ka Sngi Badum, ka NESO ka la rai ban teh lama iong ha baroh ki jaka ba kongsan jong ki jylla ka thaiñ Shatei Lammihngi ha ka 11 tarik, Nohprah, 2023,” ong u Bah Jyrwa.
“Kane ka jingpynbna ka long ban phah ïa u kyrwoh sha ka Sorkar India ba ngi pyrshah ïa ka Citizenship (Amendment) Act 2019 bad ha kajuh ka por ban pynkynmaw ïa ki paidbah bad ïa ki jingshah leh bym hok ba ka Sorkar India ka la leh pyrshah ïa ka mon jong ki paid riewlum ka thaiñ Shatei Lammihngi,” u la ong.
U Bah Jyrwa u la ongba ka NESO, ka khot bad wer ïa ki paidbah nongshong shnong jong ka thaiñ Shatei Lammihngi ban ai jingkyrshan ha kane ka sngi bad ha kajuh ka por ban bteng ïa ka jingïakhun na ka bynta kane ka jingshah leh bym hok.
