Shillong, Jymmang 26: U Archbishop jong ka Jylla Niam Bah Shillong u Most Rev. Victor Lyngdoh ha ka sngi U Blei u la plie bad pynkhamti ia ka Parish Thymmai ba la ai kyrteng “Mary Our Help Christian,” Mawpdang, East Khasi Hills District ha u Rev. Fr. Sebastian Tirkey kum u Parish Priest bathymmai.
Kane ka dei ka Parish kaba 43 ha ka Jylla Niam Bah Shillong kaba don ha New Shillong Township ia kaba la saindur ha ka rukom kaba kyrpang namarba ki paidriewngeit ki dei ki la pynkhreh bha ban pdiang ia ka jingwan jong ka Parish ba la sakhi da ki hajar ngut ki paidriewngeit.
Ka Balang Mawpdang baroh shikatta ka hap hapoh ka Parish Sts. Peter and Paul kumba 27 snem bad u Archbishop Victor u la ibit ban ai Parish. Hapdeng ka jingphyrnai jong ka bneng ki Lyngdoh bad ki Riewniam shynrang bad kynthei ki la ioh bynta ia ka Mass Bakhuid.
U Rev. Fr. Barnes Mawrie uba dei u Asst. Parish Priest jong ka Parish Mawpdang u la don lang ha kane ka sngi kynthup ruh u Rev. Fr. Laurence Nongkseh u Parish Priest jong ka Pynthorumkhrah Parish, u Provincial jong ka Shillong Province bad kiwei kiwei.
Ka Parish Mawpdang ka dei kaba pynkha na ka Parish Pynthorumkhrah Sts. Peter & Paul bad ka dei ka Parish balai hadien ka Mawpat Parish.
U Archbishop Victor Lyngdoh haba plie ia ka Parish ha Mawpdang u la pynbna ba u Sohblei Sebastian Tirkey un long kum u nongsharai mynsiem banyngkong ban peit ban jngoh ia ki paid u Blei ha kane ka Parish ha kaba u la pynkhamti ryngkat ka pynkup bor katkum ka iktiar jong ka Canon Law jong ka Balang Catholic.
U Archbishop u la ai bor ha u Rev. Fr. Sebastian Tirkey da ka jingphla jingngeit jong ki Apostle, ka jingkular ban shakri ia ki paid u Blei, ka jingdoh ieid ia ki saw tduh dong ka duwan, nangta la ialam sha ka khet jingphla bad ka jingaiti ia u shabi jong ka Parish ha u nongsharai banyngkong.
Hadien ba la pynkhamti ia u Sohblei Sebastian Tirkey ia ka bor jong Balang , u Vicar General jong ka Jylla Niam bah Shillong u Rev. Fr. Richard Manbha Majaw u la pynbna ia ki kyndon bad ia u pud u sam jong ka Parish thymmai kaba iatakhuh ia ki Parish bamarjan kum ka Mawryngkneng, ka Mawpat, ka Nongrah bad ka Mawbri Parish.
Nangta, u Archbishop u la ai ia ka dulir ia kaba la shon muhor da u Archbishop Victor Lyngdoh bad ka jingsoi ia ki dulir. Ka jingplie Parish ha Mawpdang ka dei ka jingkylla jong ka por bad kaba don ka khanatang ha Jylla Niam Bah Shillong ha ka jingdon jong ki Parish Oriest na ki Parish ba markhap.
Ka Mawpdang Parish kan duh noh ia ka Balang Mawkasiang kaba la shah pyniasnoh sha ka Mawpat Parish bad ka Parish Mawbri ka ioh noh ia ki Balang shnong Mawkhanu, Lumdiengngan, Wahmyntait baroh shi katta ba la peit da ka Mawpat Parish.
Ka khanatang jong ka Balang Mawpdang ka dei kaba la dap 100 snem tam ha kaba ka Balang ka la poi ha u snem 1917 lyngba u Apostol ka ri Khasi u Rev. Fr. Sohblei Vendrame, u Rev. Fr. Ussai, u Rev. C. Attard, u Rev. Fr. Peter Schiavon kiba dei ki mishoneri na ka ri Italy.
