Shillong, Nailur, 12: Ka Kynhun Myntri jong ka Sorkar Jylla ha ka sngi baar ka la rai ban pyndam noh ïa ka jingïasoi da ka Sorkar barim bad ki kompeni ban shna ïa ka shlem pynmih bording jong ka Kynshi Stage-I bad ka Upper Khri Stage-I bad Stage-II.
U Myntri Rangbah ka Jylla u Conrad Kongkal Sangma ha ka jingïakren bad ki lad pathai khubor hadien ba la wai ka jingïalang Kynhun Myntri u la ong, “la rai ban pyndam noh ïa ki ar tylli ki shlem pynmih bording ba la ïasoi mynshwa da ka Sorkar Jylla. Kawei ka dei ka Kynshi Stage-I bad kawei pat ka dei ka Upper Khri Stage-I & II Hydro Electrical Project (HEP).”
“Kine ki ar tylli ki projek ki dei kiba la ïasoi bad ki kompeni shimet hynrei na ka daw ka jingbym don pisa ban pyntrei ïa kine ki projek bad na ka jingkiew shaba palat ka dor bad ka jingshimpor jong ki kompeni ban pyntrei ïa kine ki projek, ka Kynhun Myntri ka la rai ban pyndam noh ïa kine ki projek.”
“Hynrei ka Sorkar bad ka tnat ba dei peit kan sa wad da kiwei pat ki kompeni ba thymmai lane da kijuh ki kompeni kiba rim na ka daw ba ka dor trei kam ïahap shuh bad ka jingwan ki teknoloji ba thymmai na ka bynta ka Pump Storage bad kiwei kiwei ki jingshna lah ban pyndonkam bad ruh ka jingpynlang ïa ka um yn lah ban pyllait na kawei ka projek bad yn pyndonkam pat sha ka bynta ba sharum jong ka wah na ka bynta kawei pat ka projek kumba ka long ha ka Upper Khri Stage I bad Stage-II.”
“Ïa kine ki projek donkam ruh ban pynkylla bad namar kata ka Sorkar bad ka tnat ba dei peit kin sa pyrkhat halor kane bad ngi kyrmen ruh shen yn sa lah ban khot noh ïa ka Expression of Interest (EoI) ban pyntyllun shakhmat ïa kine ki projek ha ka dur kaba thymmai,” la bynrap u Sangma.
Haba kylli, u Sangma u la ong, ka dor jong ka Upper Khri projek ka la poi haduh T. 9 shi Unit bad ka Kynshi ka long T. 8 shi Unit, kiba ym ïahap satia.
“Lada mynta ngi thied ïa ka bording ha ka dor T.2 haduh T. 6 namar ka jingjur ka jingdawa ka dor kan poi T. 8-9 haba ngi tip ba ka dor jong ka projek kan ailad ïa ngi ban thied ïa ka bording ha ka dor T. Rs 8 kaba la long lypa ka bym ïahap,” u la ong.
