Shillong, Nailur, 12: Ka Kynhun Myntri ha ka sngi Baar ka la rai ban thaw ïa ka State Water Informatics Centre, Meghalaya ha kaba ka tnat Water Resources kan long kum ka Nodal Department lane ka tnat kaba peit ïa kane ka Centre.
“Ka thong kaba hakhmat eh jong ka State Water Informatics Centre (SWIC) kan treikam kum ka Agency ban lum jingtip shaphang ka um ha ka jylla ha ki rukom bapher bapher la ka dei ïa u slap, ka jingdon ka um ha ki wahduid, ha ki tyllong um, ha ki umpohliew bad kiwei kiwei bad ban peit thuh ïa ki baroh shisnem bad ban ai jingtip sha ki tnat ba dei peit kum ka tnat PHE, ka tnat Soil & Water Conservation, ka tnat Agriculture, ka tnat Disaster Management bad kiwei kiwei khnang ba kin buh jingtip thik pa thik,” la ïathuh u Myntri Rangbah.
Ka jingthaw ïa ka SWIC ka long kum ka jingbthah jong ka Ministry of Jal Shakti ka Sorkar India.
Nalor kine, ka Kynhun Myntri ka la ïathir sani ruh ïa ki lai tylli ki Ordinance ïa kiba hap ban mynjur da ka Ingdorbar Thawaiñ ka Jylla. Kine ki lai tylli ki Ordinance la ïathir ïatai ha ka dur jong ki Amendment Bill ne kum ka Bill bad ïa kiba yn sa rah ha ka Ingdorbar Thawaiñ.
Ka Ordinance kaba nyngkong ka long halor ka jingpyndam noh ïa ka Rajit Lal University Act, 2011.
Kaba ar, ka dei halor ka jingpynbeit thymmai ïa ka Meghalaya Goods and Service Tax, 2017.
“La wanrah ïa kine ki jingpynbeit thymmai katkum ka rai ba la shim da ka GST Council ïa kiba yn hap ban pyntreikam da ki Sorkar Jylla bad manla ki Sorkar Jylla kin hap ban pynbeit thymmai ïa ki kyndon jong ka GST Act jong ka Jylla katkum ka jingpynbeit ba la wanrah da ka GST Council,” ong u Sangma.
Ka Ordinance kaba lai ka dei halor ka jingpynbeit thymmai ïa ka Meghalaya Medical Council Amendment Bill 2023 bad ka jingpynbeit thymmai ïa ka National Law University of Meghalaya Bill, 2023.
