Shillong, Lber, 08: Ka Bharatiya Janata Party (BJP) Meghalaya State Unit ha ka sngi Thohdieng ka la pdiang burom ïa u MLA barim ka All India Trinamool Congress na Salmanpara u Winnerson D. Sangma uba pyntip ruh ba shen ki Sitting MLA jong ka TMC ruh kin sa pynïasoh sha ka BJP.
Ïa u Winnerson la pdiang burom sha ka BJP da u State President u Rikman G Momin ryngkat ka jingsakhi lang jong ki arngut ki MLA – u Bah AL Hek bad u Bah Sanbor Shullai, u Chief Spokesperson Bah M. Kharkrang bad kiwei kiwei ki nongïalam.
Haba pynpaw ka BJP ka la jop lypa ha ka elekshon Lok Sabha na Shillong bad Tura, u Bah AL Hek u la ong, “kiwei kiwei ki MLA barim lane ki Sitting MLA shen kin sa wan ban pynïasoh bad ka BJP bad ngi shu ap sa tang ïa ka por bad ha ki khyndiat sngi, ma ki ruh kin sa wan.”
Haba kylli, katno ngut ki MLAka TMC ki ban pynïasoh sha ka BJP, u Bah Hek u la ong, “katno ngut kin wan, sa shu ap bad shu peit.”
U Bah Sanbor Shullai haba jubab ïa ka jingkylli, u la ong ba ka BJP ka long kaba la khreh ban siang Carpet saw ïa u nongïalam ka TMC u Dr. Mukul Sangma, uba long ruh u Myntri Rangbah barim ka Jylla.
Shwa kane, haba kren sha ki lad pathai khubor, u Winnerson u la ong ba um lah satia ban kren eiei ha ka kyrteng jong u Dr Mukul Sangma.
“Ïa ka rai jong u (Mukul) ngam lah ban kren eiei bad kata ka shong ha u (la u wan pynïasoh ne um wan). Ka dei ka rai jong u shimet lada u wan sha ka BJP ban shakri ïa ki paidbah.
Une u ophisar MCS barim u la ong ba ka jingthmu jong u haba u pynïasoh bad ka BJP ka long ban ai jingshakri kaba kham bha shuh shuh sha ki paidbah.
“Nga la don ha ka jylli saiñpyrthei naduh u snem 2023. Nga la mihkhmat ïa ka Salmanpara Constituency la jan 10 snem naduh u snem 2013 haduh u 2023 hynrei ngam la rem noh ha ka elekshon baladep. Hynrei nga dang don beit ha ka saiñpyrthei. Nga kwah ban shakri ïa ki paidbah, ïa ka jylla bad ïa ka ri. Nga sngewthuh ba dei tang ka BJP ka rynsan kaba lah ban shakri kham bha ïa ki paidbah ha ki jylla bad ha ka ri.
U Winnerson u la kam ruh ba kin dang don sa kiwei pat kin ban dang pynïasoh sha ka BJP ha ki khyndiat sngi ban sa wan.
