Shillong, K’lyngkot, 05: Ki bor synshar jong ka East Khasi Hills ha ka sngi Thohdieng ki la pynmih da ka hukum kaba la mana tyngeh ban tih be-aiñ ïa ki marpohkhyndew bad ban tih maw ha ki jaka lum bad ban tih shyiap narud wah da kino kino ki briew, ki kompeni ne kino kino ki bor khlem da ïoh shwa ïa ka Mining License/Quarry Permit bad kiwei kiwei ki Clearance Certificate na ki bor ba dei peit.
“Da kaba pyntreikam ïa ka iktiar ba la kupbor ha nga hapoh ka Section 144 CrPC bad na ka bynta ban ïada ïa ki sawdong sawkun jong ka mariang, la khang ban tih be-aiñ ïa ki marpohkhyndew bad ban tih maw ha ki jaka lum bad ban khat shyiap na wah da kino kino ki briew, ki kompeni ne kino kino ki bor khlem da ïoh shwa ïa ka Mining License/Quarry Permit bad kiwei kiwei ki Clearance Certificate na ki bor ba dei peit,” la ong ka District Magistrate Kong RM Kurbah ha ka hukum.
Kane ka long hadien ba ki bor synshar district ki la ïoh pdiang ïa ka jingujor ba ka don ka jingtih be-aiñ ïa ki marpohkhyndew bad ka jingtih maw khamtam ha ki jaka lum bad ka jingkhat ïa u shyiap na wah ha ki bynta bapher bapher jong ka East Khasi Hills District, khamtam ha ka shnong Sohiong, Mawblei bad ha Umphyrnai kaba la ktah haduh katta katta ïa ki tyllong um ha ki sawdong sawkun bad ki jaka ba marjan.
La pynpaw ruh ba ka hukum ka dei kaba la ïoh pdiang na ka National Green Tribunal, Principal Bench, New Delhi, kaba khang ïa kino kino ki briew, ki kompeni ne kino kino ki bor khlem da ïoh shwa ïa ka Mining License/Quarry Permit bad kiwei kiwei ki Clearance Certificate ba la ai da ka Ministry of Environment, Forest and Climate Change, ka Sorkar India ha ka EIA Notification 2006 bad ha ka jingpynbeit thymmai.
Kum kine ki jingtih maw bad tih shyiap ka lam sha ka jingtwa jong ki maw, u shyiap bad kiwei kiwei ki marpohkhyndew sha ki wah bad ka jingtwa na ki jaka lum kaba lam sha ka jingpynjulor ïa ki jingthung jingtep kiba don ha ranab lum, ka pynjulor ïa ki tyllong um bad ka pynïap ruh ïa ki dohum doh wah.
Bun na ki wah ki la jngut bad jaboh tang na ka daw ka jingtih maw bad khlong shyiap bad ka um kam long shuh ban pyndonkam bad kam long shuh ban dih ban sum ban sait.
“Ka long kaba donkam ban pyntikna ba kan don ka jingbud ryntih ïa ka hukum ba la pynmih da ka NGT hapoh ka East Khasi Hills District bad ban khanglad ïa ka jingma jong ka jingim briew, ka koit ka khiah bad ka jingshngaiñ bad ban ïada ïa ka mei mariang,” la ong ka hukum.
