Shillong, Jylliew 28: Ka Meghalaya State Olympic Association (MSOA) ka la pyntip ba ka jingpynkhreh ia ka 6th Meghalaya Games ka ban pynlong ha West Jaintia Hills District ka la iaid shaid shaid shakhmat.
“Lai sien ngi ladep wan sha Jaintia Hills ban jurip ia ka jaka. Kaba nyngkong ngi la iakynduh ia ki District Sports Officer bad ngi la khmiih ban peit ia ka jingpynkhreh ban pynlong ia ka Meghalaya Games kaba hynriew,” la ong u Working President ka MSOA Bah John F. Kharshiing.
“Ngi sngewkmen hadien ba ngi ladep leit ar sien na ka liang ka ophis MSOA ngi la iakynduh ia ki DSO bad ngi la iasyllok bad ka West Jaintia Hills District Sports Association, ryngkat bad ki 25 tylli ki Association ha kaba ngi la jurip bad ngi sngewkmen ban lap ba ha West Jaintia Hills District ki don bun ki Hall kiba lah ban pynlong ia ki jingiakob ialehkai bapher bapher. Ka kabu ka long ba kine ki Hall ki iajan kawei ia kawei bad kabym da donkam eh ban ia iaid jngai, naba ka jngai eh ka dei 1 kilomitar tam,” la iathuh u Bah Kharshiing.
“Ngi khmih lynti ba kin don 25 tylli ki jait jingialehkai (Discipline) ha kane ka Meghalaya Games kaba mynta,”u la ong.
Kum ban shu pyntip hangne, ia ka 6th Meghalaya Games yn sa pynlong ha u snem 2025.
Ha kaba iadei bad ka jinglut jingsep ka MSOA ka khmih lynti ba kan kham duna ia kaei kaba la pynlut ha Tura kaba la kot T. 23 klur.
U General Secretary ka MSOA Bah Finely Pariat u la pynpaw ba dei ban kynmaw ba kane ka dang dei tang ka jingialehkai jong ki District bad ba ym dei ban khmihlynti than ba kiei kiei kin long kiba biang pura.
