Shillong, Risaw 19: U President jong ka Meghalaya Pradesh Congress Committee (MPCC) Bah Vincent H. Pala ha ka sngi Palei u la ïathuh ba ka party ka la long kaba la pynkhreh na ka bynta ka elekshon Lok Sabha bad ka elekshon MDC, ki ban sa long u snem 2024.
“Ngi long kiba la pynkhreh ban leit sha ka elekshon lada dei ba ka long ha u bnai Rymphang lane lada ka long ha kano kano ka por. Kane ka shong ha Sorkar Jylla kumno ban pyntip,” ong u Bah Pala haba ïakren bad ki lad pathai khubor hadien ba la wai ka lympungbah State Youth Congress Convention ba la pynlong da ka Meghalaya Pradesh Youth Congress (MPYC) ha nongbah Shillong.
U la ong ba ka party kan sa phah da ka jingthoh sha baroh ki Block ba kin pynstet noh marmar ban phah ïa ki kyrteng jong ki kyrtong ki ban ïakhun na ka bynta ka elekshon sha ka Khasi Hills Autonomous District Council bad sha ka Jaiñtia Hills Autonomous District Council.
“Ïa kane ka kam ngin sa sdang naduh ka lah sngi U Blei ka ban sa wan. Ha ka jingshisha ka jingpyntyllun ïa ka kam ka ju long naduh u Naiwieng bad ïa ka thup kyrteng la ju pynmih paidbah ha u Nohprah bad ngin sa pynbna ïa ki kyrteng jong ki kyrtong tang shu pyntip ïa ka tarik ban pynlong ïa ka elekshon,” la ong u Bah Pala bad bynrap ba kan ym don kano ka jingpynkylla bad ba ka State Election Committee (SEC) bad ki District Election Committee (DEC) kin sa shong ban phah ïa ki kyrteng jong ki kyrtong.
U la ïathuh ruh ka rukom ban jied ïa ki kyrtong kan long hi kumjuh na ka bynta ka elekshon MP bad MDC.
Haba kylli, hato kin don neem ki MDC jong ka Congress kiba la pynkhreh ban leit pynïasoh sha kiwei ki party, u Bah Pala ula ong, “ngam don jingtip eiei halor kata namarba u MDC na Mairang um shym la wan sha ka jingïalang (kaba la long dang shen). Ngam lah ban ong eiei lada mano mano kin leit pynïasoh (sha kawei pat ka party) namarba ka aiñ Anti-Defection (ha ki district council) kam treikam satia.”
“Ngam lah ban ong lada iwei ne arngut kin mih noh na ka party hynrei ka jingshisha ka long bun kiba la pyntip ïa nga ba ki kwah ban wan pynïasoh sha ka Congress shwa ka elekshon,” u la kam bad ïathuh ba ki don bun ngut ki nongïalam na rilum Khasi bad Jaiñtia bad kynthup ruh na rilum Garo kiba la pynpaw ïa ka jingangnud ban ïakhun ïa ka elekshon na ka seng Congress.
Une u nongïalam ka Seng Congress u la kam ba ki don ruh ki MLA, kiba lah ban aplai tiket na ka bynta ka eleshon MDC. “Ka Party kam don jingwit eiei lada ka aiñ ka shah ïa ki MLA ban ïakhun (ïa ka elekshon MDC),” u la ong.
“Dei tad ynda ka kam ka la ïaid shakhmat shwa u Nohprah, ngin sa sngewthuh katno ngut ki kyrtong ba ngin pynïakhun na ka bynta ka elekshon MDC,” u la bynrap.
Shuh shuh, u Bah Pala u la ong ba ka jingaiti ïa ka tiket na ka bynta ka elekshon MDC kan shong beit ha ka rai jong ki Block namar ba kam don kano kano ruh ka jingtuklar na ka High Command na Delhi.
“Ka shong beit ha ka jingstad jong ki Block, ïano kin tyrwa bad ïano kin mynjur kum ki kyrtong na ka bynta ka elekshon MDC. Uno uno u dkhot jong ka party u don ka hok ban pan tiket. Lada ym don kyrtong, kino kino kiba kwah ban pynïasoh bad ban pan tiket ki lah ban leh ïa kata bad ngin ym don jingkhang satia ïa kaba kum kata,” u la bynrap.
