Delhi, Lber 09: U Arun Goel u la resaiñ noh kum u Election Commissioner jong ka Election Commssision of India (ECI) shwa ba ka Elekshon Lok Sabha kan long sa tang khyndiat bnai mynta u snem.
Ka samoi treikam jong u Goel kan kut haduh u snem 2027. Ïa ka shithi iehnohkam jong u Goel la pdiang da ka President ka ri ka Droupadi Murmu.
Ïa kane ka jingiehnohkam jong u Goel ym lah satia ban tip ïa ka daw tynrai.
“Katkum ka Clause (1) jong ka Section 11 jong ka The Chief Election Commissioner and other Election Commissioners (Appointment, Conditions of Service and Term of Office) Act, 2023, ka President ka sngewbha ban pdiang ïa ka shithi iehnohkam ba la phah da u Arun Goel, u Election Commissioner naduh ka 9 tarik, Lber, 2024,” la ong ka Gazette Notification.
Shwa kane, u Anup Pandey u la resaiñ kum u Election Commisisoner ha u Rymphang bad mynta ka kynhun ba lai ngut jong ka Election Commission of India ka don sa tang ïa u Chief Election Commissioner u Rajiv Kumar.
U Arun Goel u dei uba la don bynta bha ban pynkhreh ïa ka elekshon Lok Sabha bad uba la leit jngoh ruh ïa kiba bun ki jylla hapoh ka ri ban pynkhreh ïa ka elekshon.
Da ka jingiehnohkam jong u Goel, ka jingkitkhlieh mynta ban pynïaid ïa ka elekshon ka la hap ha ka tyrpeng jong u Chief Election Commissioner u Rajiv Kumar.
U Arun Goel u dei u ophisar IAS barim na ka Punjab Cadre bad u la shimti kum u Election Commissioner ha ka 21 tarik, Naiwieng, 2022. U Goel mynshwa u la shakri kum u Secretary hapoh ka Ministry of Heavy Industry.
Ka thymmei khubor ka ïathuh ba ka tarik ban pynbna ïa ka elekshon Lok Sabha da ka Election Commission kan long la kumno kumno ha ka taiew ban sa wan.
U Arun Goel uba la pyndep ïa ka M. Sc. ha ka Mathematics u la ïoh pdiang ïa ka Chancellors Medal of Excellence na ka bynta ka jingpas bha First Class First bad thaw rekod ruh ha ki jingpule jong u ha Punjabi University.
Da ka jingmynjur jong ka President ïa ka The Chief Election Commissioner and Other Elections Commissioners (Appointment, Conditions of Service and Term of Office) Bill, ka la pynkylla lut ha kaba ïadei bad ka kam ban thung ïa ki Election Commissioners ka ban sa treikam noh mardor.
Katkum ka aiñ-rew, ka Committee ba la khlieh da u Myntri Rangbahduh u Narendra Modi, yn sa thaw ban peit bniah halor ka jingthung ïa ki Election Commissioners. Ka Committee ka kynthup ïa u Nongïalam ka Liang Pyrshah ha Lok Sabha bad ki Myntri Sorkar Pdeng ba la thung da u Myntri Rangbahduh.
