Shillong, Naitung 13: U Myntri Rangbah ka Jylla u Conrad K. Sangma ha ka sngi Palei u la pynkup burom ia ki khynnah skul kiba la wan shakhmat ha ka eksamin ba la pynlong da ka Meghalaya Board of School Education (MBoSE) ha ka ‘Meghalaya Education Symposium’ ryngkat ka jingsakhi jong u Myntri ka tnat Pule Puthi u Rakkam A. Sangma ha ka jingialang kaba la long ha Shillong International Centre for Performing Arts and Culture (SICPAC).
Ka ‘Meghalaya Education Symposium’ ka dei ka sienjam jong ka Sorkar Meghalaya ban kyntiew ia ki jaka pule puthi bad ha kane ka prokram la iashim bynta lang da ki Myntri Sorkar kiba kynthup ia ka Dr. Mazel Ampareen Lyngdoh bad u Bah Paul Lyngdoh, u nongai buit jong ka tnat Pule Puthi u Bah H. M. Shangpliang, u Commissioner & Secretary ka tnat Pule Puthi u Pravin Bakshi bad kiwei kiwei.
U Myntri Rangbah haba kren ha kane ka jingialang u la ong ba kane ka rynsan ka long ban iamir jingmut halor ki jingkylla kiba kongsan ia kiba ka Sorkar ka la shim ha kaba iadei bad ka jingtreikam jong ka tnat Pule Puthi. “Ngi la ioh ia ka jingkyrkhu lyngba ki samla pule kiba dei ban ioh ia ka kabu kaba bha tam, kata ym tang ha kaba iadei bad ka jingpynkhlaiñ ia ka thymmei jong ka pule puthi bad ban kyntiew ia ka jinglong jingman jong ki ha baroh ki liang,” u la ong.
“Ngi la thaw ia ka Youth Policy ka ban aibor ia ki samla bad ka Sorkar ka la shim ia ki sienjam ban kyntiew kumba 2000 tylli ki skul Lower bad Upper Primary. Kumjuh da kaba mang pisa T. 920 klur ban tei ia ki 39 tylli ki Eklavya Model Residential Schools (EMRS) kum shibynta ban kyntiew ia ka pule puthi,” u la ong.
“Da kaba mang na ka bynta khyndai tylli ki kolej ha baroh kawei ka jylla kan pynthikna ba ki samla kin ioh ia ka pule puthi kaba biang ha ki thain nongkyndong, ka jingpynioh ia kajuh ka kabu na ka bynta baroh. Ha ka jingpyrshang ban kyntiew ia ka pule puthi lyngba ka Digital, ngi la sam kumba 26,000 tylli ki Digital Tablet sha ki samla khynnah skul na ka bynta u snem 2021-22,” la bynrap u Sangma.
“Na ka liang ka Sorkar ka angnud ban kynthup ia ki jingai jingmut bad ki jingmynjur lyngba ka jingpynlong ia ka ‘education symposium’ ban iai bteng ban kyntiew ha ka liang ki jingpule kiba kham shalor. Nga ai khublei ia ki samla kiba stad kiba wan shakhmat ha ki eksamin ba la pynlong da ka Meghalaya Board of School Education,” la bynrap u Sangma.
U Myntri ka tnat Pule Puthi u Rakkam A. Sangma haba kren pdiang, u la ong, ka Sorkar Meghalaya ka la phaikhmat halor ki kam pynroi bad kum ka jylla ka la iaid ha u mawjam uba kham shakhmat. Lyngba ki jingthmu jong kane ka thong ban kyntiew shakhmat ia ka jylla shibun ki sienjam la lah ban shim, kata kum ha kaba wanrah ia ki University, ka jingplie ia kiba bun tylli ki kolej bad ka jingpynbha ia kiba bun ki iingskul kiba la rim.
Ka Myntri ka tnat ka Koit ka Khiah ka Dr. Mazel Ampareen Lyngdoh, ka la pynpaw ia ka jingdonkam ban kyntiew ha ki bynta bapher bapher ha ka liang ka pule puthi. “Nga sngewkmen shibun ban ioh ia ka kabu ban ieng na ka bynta ka lawei ka jylla jong ngi bad ban pynpaw ia ka jingsngew sarong halor ka jinglah ka jong ki ka ban pynurlong ruh ia ka jingangnud bad ka jingkyrmen ka jong ngi. Ka long kaba donkam ba ka jingtreikam ha ka liang ka pule puthi ka jong ngi kan kyntiew ia ki samla pule ym tang ha ka liang ka jingpule hynrei ruh ban pynpaw ia ki sap ki phong ki jong ki khnang ba kin lah ban ia aireng ha kane ka pyrthei jong ka jingialeh. Ka pule puthi ka dei ka thong ban wanrah ka jingkylla ia ka lawei jong ka jylla Meghalaya. Ngi khmih shakhmat ban iatreilang na ka bynta ban kyntiew bad pynbha shuh shuh ha ka liang ka pule puthi ha ka jylla ka jong ngi.”
Ka “Meghalaya Education Symposium 2023” ka la long kum ka rynsan kaba don jingmut na ka bynta ban iamir jingmut lang ha ryngkat ka jingiatreilang hapdeng ki nongialam, ki riew shemphang ha ka liang ka pule puthi nalor ki kynhun kiba ia don bynta. Kane ka plielad ruh ban iamir jingmut halor ki jingshem bad ki sienjam ban kyntiew ia ka pule puthi ha ka jylla Meghalaya.
