Shillong, Nailur 21: Ka Khasi Students Union (KSU) Mawiongrim Unit ka la byrngem tyngeh ia ki bor pyniaid jong ka Adsan Mahindra ba kam dei ban pyndonkam bakla ia ka kyrteng jong ka shnong Mawiongrim da kaba pynkylla sha ka kyrteng Barapani.
Ka seng ka la ioh jingtip halor kane na ki nongshong shnong jong ka shnong Mawiongrim hadien ba ka Adsan Mahindra ka la pyllait ia kawei ka Advertisement ha ka rynsan Social Media bad kiwei kiwei ki lad pathai khubor da kaba pynpaw ba ka Adsan Mahindra ka don ha Barapani.
Hapoh ka jingialam jong u President u samla Domayan Skhemiew ha ka sngi Palei ki la leit ban iakynduh ia ki bor pyniaid jong ka Adsan Mahindra bad dawa ba dei ban pyndam mardor ia ka Advertisement ba la shu pynkylla kyrteng khlem nongrim ia ka shnong Mawiongrim sha ka ‘Barapani.”
Ka seng ka la pynpaw ba kane ka jingleh jong ka Adsan Mahindra ka la pynbitar ia ka Seng bad ia ki paidbah nongshong shnong jong ka shnong Mawiongrim bad na kane ka jingleh jong ka kompeni ka la ialam bakla ia kiba bun bad khamtam ia ki briew kiba nabar.
Mar mar ka Seng ka la dawa ia ki bor pyniaid jong ka Adsan Mahindra kaba don hapoh u pud u sam jong ka shnong Mawiongrim ban pynbeit noh mardor hapoh shitaiew hynrei lym kumta ka seng kam banse ban shim da kiwei pat ki sienjam ba tyngeh pyrshah ia kane ka kompeni die kali.
“Ka Seng ka maham tyngeh ia baroh ki kompeni lane ia ki briew kiba ju wan leh ia ka khaii ka pateng hapoh u pud u sam jong ka shnong Mawiongrim ba kim dei ban leh klumar lane ban pyndonkam bakla ia ka kyrteng jong ka shnong Mawiongrim ia kaba la buh bad la suit la shor naduh ki por u mynbarim,” ong u kyrwoh ba la phah da u General Secretary ka KSU Mawiongrim Unit u samla Macdonald Jitem.
