Shillong, Nailar, 09: Ka Meghalaya Public Service Commission (MPSC) ha ka sngi Thohdieng ka la pynmih ïa ki Marks jong baroh ki nongïakhun ïa ka Meghalaya Civil Services (MCS) Preliminary examination.
“Ki marks kiba ïadei bad ka Meghalaya Civil Services (MCS) Preliminary examination mynta la pynbna paidbah,” ong ka hukum ba la pynmih da u Chief Controller of Examination ka MPSC.
Ka MPSC ka la pyndam noh ïa ka Office Notice kaba la pynmih ha ka 6 tarik Nailar 2024, kaba pan ïa ka jingmynjur salonsar na ki nongïakhun eksamin ban pynbna paidbah ïa ki marks. Ka la pynmih ruh ïa ka Answer Keys jong ka MCS preliminary examination kaba la long ha ka 4 tarik, Naiwieng, 2023.
Shuh shuh, ka Commission ka la pynkynriah noh ïa ka personal interview na ka bynta ka post Meghalaya Police Service (MPS).
“Na ki daw ki bym lah ban kiar, ïa ka personal interview na ka bynta ka post jong ka Meghalaya Police Service hapoh ka tnat Home (Police) (Nailar.2019) la pynbna lyngba ka jingpyntip kaba la pynmih ha ka 25 tarik, Naitung, 2024 yn pynkynriah noh tad haduh ban da pynbna da kumwei pat. La ai jingmut ïa ki kyrtong ba kin peit ïa ka website jong ka Commission na ka bynta kiwei pat ki jingpyntip,” ka la ong.
Ïa ki hukum la pynmih hapoh 24 kynta hadien ka jingïalang kaba la long hapdeng u Chairman jong ka MPSC bad ki nongïalam jong ka Khasi Students’ Union (KSU).
Ha ka sngi Palei, ki dkhot ka KSU ki la thang ïa u tyngshop jong ka MPSC kum ka jingpyrshah ïa ka jingbym lah jong ka Commission ban pynbna paidbah ïa ki marks jong kiba ïakhun ïa ka eksamin MCS.
