Nongpoh, Ïaïong 05: Kum ka jingpynneh pynsah ia ka riti ka dustur bad ka jinglong tynrai hapoh ka Raid Margnar kaba hap hapoh ka Hima Mylliem, kane ka Raid ha ka sngi Thohdieng ka la pynlong ia ka lehniam tynrai kaba la tip kum ka tongdoh paidbah jong ki khun ki hajar ha ka Pung Mawthlen.
Ia kane ka tamasa tong dohkha kaba ju pynlong manla u snem da u Syiem jong ka Raid Marngar ryngkat ki Longsan ki Mansan la pynlong shuwa da ka nguh ka dem blei kumba la ialam da ki longshuwa ki manshua, ha kaba shuwa ki khun ki hajar kin hiar sha ka pung ban tong ia ki dohkha kiba ka Raid ka ki ju theh dohkha shisien shisnem khnang ba ki khun ki hajar kin kmen kin risa haba pynlong ia kane ka tamasa kaba shi sien shisnem.
Ha ka por mynstep, u Syiem ka Raid Marngar, u Paiem Richard Syiem ryngkat ki Longsan ki mansan ki la pynrngad ia ka um na kane ka pung bad ai nguh ai dem da kaba knia da ki syiar khnang ba ki khun ki hajar kin lait na ka jingma jingmynsaw haba ki la hiar sha ka pung ban ia tong doh.
Da ki hajar ngut ki paidbah, naduh ki longkpa, ki longkmie, ki samla samhoi bad ki heprit ki la ia hiar ryngkat ka kmen ka risa ban ia tong dohkha ha kane ka pung.
U Paiem Richard Syiem u la iathuh hadien kane ka tamasa tong dohkha, ka Raid kan sa pynlong sa ia kawei pat ka jinglehniam kaba la tip kum ka ‘Beh Huleng” ha kaba ki riewrangbah ki beh ia ki Shrieh Huleng ha khlaw bad hadien ba la ioh pat kin sa wanrah sha ka ingsad ka ingsunon ban pyndep ia ka niam ka rukom.
