Shillong,ïaïong 05: Ka surok ba la shna lyngba ka Smart City Project ha ka shnong Lachumiere ka la shu pynsah umdum ïa ki babun balang hadien ba la siang pynban da ka dewbilat ym shuh da ka surok rong kumba long naduh ki por barim.
Kane ka surok ka dei kaba ju ïaid kali na shadien jong ka ophis jong ka Meghalaya Public Service Commission (MPSC) bad kiwei kiwei ki ophis kiba bun kiba don sha kane ka liang. Hapdeng jong ka surok ka la don ruh ka skul All Saint Higher Secondary School kaba bun ki paidbah ki ju sngewtynnad ban phah skul ïa ki khun. Lyngba kane ka surok la ju ïohi naduh ki por barim baroh ba ki kmie ki kpa kiba wan shaw skul ïa ki khun bunsien ki ju ïoh ban ïeng kali ban ïaid kylluid khlem da kyrkieh namar ki sngewshngaiñ ba lait ban ïaid napoh ka surokbah.
Kumba ngi sakhi pat halor kine ki sngi kiba mynta ka jingshngaiñ ka la duh noh namar ba ym ïoh shuh ban ïaid kali na kane ka surok bad bunsien haba wan shaw skul ne leit trei ophis ki la hap ban ïeng kali hapoh surokbah MG Road, IGP Point bad ka jingtieng jingsmiej ka la pynlong ïa kiba bun halor shuh shuh ka jingjia jong ka jingbun kali kaba la pynlong kum ka jingkhapngiah kali (Traffic jam), la ong u Bah Banshai Marbaniang bad u Bah Churchill Syiemlieh kiba dei ki dkhot jong ka Meghalaya Awaken Concern Citizens (MACC) ha u kyrwoh ba la phah sha ki lad pathai khubor.
Ka la wanrah ïa ka jingsngewsih kaba khraw ïa ki paidbah haba ki ïaid lynti halor ka leit ka wan manla ka sngi napoh ka surok bah bad ruh khamtam ïa ki kmie ki kpa kiba hap ban phikir bad husiar khamtam haba phai katkum kapor ba dei ban leitbuh skul ne shaw skul manla ka sngi haduh teng teng ba kim lah ban poi halor kapor ba biang namar ka jingjur jong ka jingkhapngiah kali (traffic jam) kaba la pynlong ka jingbymshngaiñ ïa ki paidbah khamtam ki khyllung khynnah, la ong kine ki arngut ki rangbah.
Ka jingwanrah jong ka Sorkar Jylla ban pyntreikam da kaba pynbha ïa ka surok ha kaba sdang ki paidbah ki dang mut ba yn dang kham pynheh pynïar ïa ka surok bad ruh ban pynduna na bynta ka jingkhapngiah kali hapdeng manla ka sngi. Bun ki paidbah kimlah ban tip mano ba pynbha ban pyntreikam ïa katei ka surok bad ki dang mutdur hi ba kalong beit napoh jong ka tnat sorkar lyngba ka PWD road, hynrei ynda ïohi pat ha kine ki sngi kiba bynta ym shym patlah ban pyntreikam ha ka ban pyndep ïa ka watla hadien ba la slem naduh ki snem shakhmat ba la pyntyllun. Shuh shuh nalor kata ynda haba ïohi ba nalor ka surok rong la pynkylla ban siang noh pynban da ka dewbilat bad ba dang pynrit shibun nalor ka surok kaba la long shisha kum ka jingïuhroit ïa ka hok jong ki paidbah Nongshong shnong da kaba pyrshang ban pyntieng pynsmiej bad ruh ban ym ailad shuh ban ïaid kum ka surok paidbah.
Lyngba ka jingpyntreikam ïa ka surok ka la wanrah bun ki jingeh ïa ki paidbah kum ki nongtrei sorkar, ki longkmie longkpa ba wan shaw skul bad kumjuh haduh ki skul bad ki ophis sorkar ba bun.
Ki jingjia kiba la mih kilong ka jingïeng kali ka bymbiang shuh haduh la hap ban ïeng pathar tang namar ba ym banse ban beh kloi ïa ka kam katkum ka por ne haduh wat ban leit shaw skul khyllung khynnah ruh kumjuh. Ka jingwanrah ban dang heh dang ïar ka jingkhapngiah kali hapoh Shillong khamtam hapoh Lower Lachumiere kaba long ka shnong kaba bun ki ophis treikam sorkar bad ka jaka pule ruh kumjuh.
Nalor kata shuh shuh ka jingduna ki lynti ïaid kjat namar ka jingrit ki surok ïaid kali ka dang pynlong syier mynsiem ïa kiba bun balang khamtam lada dei ki riew tymmen bad ki khyllung khynnah kiba hap ban ïaid manla ka sngi. Kane baroh ka la pynlong ban wanrah ïa ka jingmut jingpyrkhat bym banse ïa ngi ki briew kiba ñiah kali kat haduh ban ïaid kulmar khlem da salia shuh wat ban pynkheiñ nalor ki Rraffic Rules.
Ka daw kaba pynlong ïa ngi ba ngi hap ban kren ïa kane ka mat kaba long ka bynta kaba kongsan namar ba ngi dei ban ïoh ïa ka Sorkar kaba biang ban ai ka jingshakri kaba pura ïa ngi kum ki paidbah Nongshong shnong jong ka Jylla bad kaba ngi dei ban sngewthuh ba kano kano ka bynta kaba ngi pyndonkam hangne ha sla Pyrthei ka long ka bynta ba kordor jong u paidbah bad ym tang katta nalor kumjuh ba ngi long ruh ki paidbah kiba don halor ka bor kaba long ka Hok ban ïeng bad jied ïa U ne ka Briew ki ban leit ban long ki Nongmihkhmat halor ka kyrdan na ka bynta ban wanrah ïa ka jingdonkam jong ki paidbah ym ban shu leit hylla ne put turoi sharum shaneng haduh ban da poi u pud ban shu leh lyndet ïa ki paidbah tang namar ka jingsngewheh kum u Kynrad nalor duh khlem da pyrkhat bad kynmaw shuh ïa ka kyrdan halor ka jingshakri paidbah.
Ka Meghalaya Awaken Concern Citizens kumba ka pyrshang ban kren bad sakhi kum ki nongshong shnong kiba ïeng ban shakri halor ka bha ka miat jong ka imlang sahlang ngi kyntu jur ïa ka Sorkar Jylla lada dei na ka tnat jong ka PWD (Roads) ne lyngba kano kano ka department kiba shimti ban pyntreikam ïa kane surok ladei shisha ban pynbha katkum ka surok kaba dei ban ïaid kali bad ban buh ruh ïa ki nala tuid um kiba biang bad ha ryngkatlang ka lynti ïaid kjat paidbah kumba ka dei ban long bad ban donkam shuh shuh ha ka ban pynheh pynïar nalor kaba rim ym pat da kaba pyrshang ban buhrieh shadien da kaba pynjah bad pynrit kham palat ban ïa kaba long naduh ki por ba la leit.
Lada sngap bad sngewthuh kane kan long ka jingbha da kaba wanrah ka jingsngewshngaiñ ïa ki paidbah bad ruh ka jingsuk mynsiem halor kiba bun kiba donkam bad ban dang pynduna ruh ia ka jingkhapngiah kali ha surok kaba la wanrah mynta manla ka sngi lyngba ki jaka bapher bapher jong ka Shillong bad kumjuh haduh kine ka sngi shapoh Lower Lachumiere.
