Mairang, ïaïong, 05: Ka kynhun Search and Rescue Team ha ka sngi Thohdieng ka la ioh sei ia ka metiap jong uwei u shynrang briew uba la antad ba u la don kumba 25-30 snem ka rta na ka kshaid Thup Thup, kaba don hajan ka shnong Wei-Mynsier kaba hap ha Eastern West Khasi Hills District.
Katkum ka thymmei khubor ba la iohlum, la iathuh ba ha ka por ba la ioh sei ia ka metiap la lap ba la teh da u tyllai na ryndang jong une u lanot bad ia u tyllai la teh lang ha u maw uba don hapoh um bad na ka met jong une u lanot la lap ia kawei ka torchlight kaba rit.
Ia ka metiap la pynkit noh sha Tirot Sing Memorial Civil Hospital, Mairang bad haduh mynta ym pat lah ban tip la une u briew u dei uei bad u sah ha kano ka shnong bad ka jingtohkit jong ki Pulit halor kane ka jingjia ka dang iaid shakhmat. Na ka liang jong ki Pulit ki kyrpad ruh ia kano kano ka longing kaba jah briew ha ka thain Eastern West Khasi Hills kin sngewbha ban leit peit ia kane ka met ba la buh ha Civil Hospital, Mairang.
Kum ban shu pynkynmaw hangne ba katkum ka jingiathuh jong u Sordar ka shnong Wei Mynsier ia ka metiap la lap da ki briew kiba leit khat shyiap na kane ka wah ha ka 3 tarik u Iaiong 2024.
