Shillong, Rymphang 11: Ki dkhot jong ka Khasi Student’s Union (KSU) Mission Compound Unit ba la lamkhmat da u Secretary u samla Meban Syiemlieh ki la beh krad ïa ki bar jylla kiba trei bylla hapoh u pud u sam jong ka shnong Mission Compound khlem pynbiang ïa ki kot ki sla kiba biang.
Ka seng, hadien ba ka la ïoh jingtip ba ki don ki nongtrei bar jylla kiba trei ba ktah hapoh u pud u sam jong ka shnong mar mar ka seng ka la pynlong ïa ka jingkhynra ha kaba ka la lap da la ki jong ki khmat ba ki don shisha ki bar jylla kiba la trei bylla khlem ki kot ki sla kiba biang. Mardor ka seng ka la beh noh ïa ki bar jylla bad phah leit phai noh ïa ki sha ka jaka ba ki wan.
Ka seng ka la maham ïa ki kontraktor ba kim dei satia ban wan ïalam trei bylla da ki bar jylla hapoh u pud u sam jong ka shnong hynrei ki dei ban aikam sha ki trai jylla ia ki kam kiba dang lah ban trei.
