Shillong, Jymmang, 29: Ki shipai Border Security Force (BSF) jong ka 172 Battalion, Meghalaya ki la ioh ban pyllait im ia ki muid na khappud ka East Jaiñtia Hills, Meghalaya kaba don bad ka ri Bangladesh ia kiba la thmu ban khaïi beaiñ sha ka ri Bangladesh.
Ki shipai BSF kiba ju pynlong ia ka jingtalasi ha Rattachera ki la pynsangeh ia kawei ka trok kaba wan na Kalain, Assam sha Umkiang. U nongñiah jong ka trok ha ka jaka ban pynsangeh ia kali, u la ñiah stet pynban ban lait na ka jingshah bat ha ki shipai BSF.
Ha ka jingkthong kaba jngai 10 kilomitar, ki shipai BSF ki la ioh bat ia kane ka trok hajan Petrol Pump, Umkiang.
Ha ka jingtalasi, ki shipai BSF ki la ioh kurup 20 tylli ki muid ba la thmu ban khaïi sha ka ri Bangladesh katba u nongñiah jong ka trok u la phet krad lailum laiwah da kaba shim kabu ia ka jingdum jong ka miet.
Ha kawei pat ka jingkhynra, ki shipai BSF jong ka 4th Battalion ki la ioh ban kurup 17 tylli ki muid na Rongtilla ia kiba la thmu ban khaïi be-aiñ sha ka ri Bangladesh. Ia kine ki muid la aiti noh sha ki Pulit ban leh ia kaba donkam.
U kyrwoh ba la phah da u PRO ka tnat shipai BSF Meghalaya u la pyntip ba ki shipai BSF, Meghalaya Frontier ki la ioh kurup haduh 1669 tylli ki masi/muid naduh u bnai Kyllalyngkot, 2023 na khappud.
