Shillong, Nohprah, 07: Ka Meghalaya Medical Drugs & Services Limited (MMDSL) ha ka sngi Palei ka la pynshai ba katkum ka kaiphod ba la leh test (Quality Test report) ka la pynthikna ba u dawai kuli Albendazole u biang nadong shadong katkum ki kyndon bad kam don kano kano ka jingktah kumba la pur ka hamsaia ha ka jylla.
Ha u kyrwoh, u Managing Director jong ka MMDSL u Ramkumar S u la ong tang shu ïoh ïa ka kaiphod ha State Warehouse, ïa u dawai kuli Albendazole batch no. MS4AI2301 (Manufacturing Date: Jan-2023, Expiry Date: Dec-2025) la bthah sha ki District katkum ka jingdonkam.
Ïa ka test la leh ha u Rymphang, 2023, kynthup ruh ïa ka jingleh test ha ka jaka ba la shna bad ka kaiphod leh test jong ka National Accreditation Board for Testing and Calibration Laboratories (NABL) ki pynshisha ba u dawai kuli u dei uba biang nadong shadong.
Halor ka jingïoh pdiang ïa ka jingtip na ka Regional Drug Testing Lab (RDTL), Assam, ha u Risaw, 2023, kaba kdew ba u dawai kuli, ‘um don ïa ka standard quality,” mar mar ka bthah ban pynsangeh ka jingsam ïa une u dawai kuli.
U Ramkumar u la ong ba ïa ka Comprehensive Quality Reassessment la pynlong biang sa shisien ha u Naiwieng, 2023 da ka Quality Control Division of Meghalayan Medical Drugs & Services Ltd kaba la shim ïa ki nuksa dawai kuli na ki Warehouse.
Ïa kine ki nuksa la phah sha ka NABL, ka Laboratory ba la ïoh jingithuh ha Kolkata, katba ïa ka jingshna bad ïa u Batch Number la buhrieh noh. U Batch Number ba la pynmih da ka Quality Assurance department u dei u MMDSL QC 0022.
“Ka kaiphod ka pynshisha ba u dawai kuli Albendazole uba don ïa u batch no. MS4AI2301 (Manufacturing Date: Jan-2023, Expiry Date: Dec-2025) u dei uba biang pura,” u la ong haba pynpaw ba ka jingleh ïa ki tes ka long ha ka Laboratory jong ka NABL bad ha ka Manufacturer’s in-house Lab.
“Kine ki ar tylli ki Laboratory ki pynshisha ba u dawai u dei uba biang, uba shngaiñ bad ka Meghalayan Medical Drugs & Services Ltd ka la shim ïa ki sienjam ban phah peit bniah ïa ka jinglong jong u dawai, hadien ba la mih ka khubor hamsaïa.
Nalorkata, kam don kano kano ka jingktah ba la pynpaw haduh mynta,” u la ong.
Shuh shuh u Managing Director u la kular ba ka Sorkar ka la shimkhia bha ïa ka jingshngaiñ jong ki dawai ban pynthikna ba ka jingai jingshakri sha ki paidbah ka long ha ka por kaba biang.
