Shillong, Nohprah, 07: U Myntri ka tnat Bording ka Sorkar Jylla u Abu Taher Mondal u la leit jngoh ïa ka Pump Storage Programme at Purulia (PPSP), kaba don ha West Bengal, kaba lah ban pynmih bording haduh 4×225 Mega Watt kaba la pyntreikam naduh u snem 2007.
Ïa u Myntri la synran lang da u Commissioner & Secretary ka tnat Bording u Sanjay Goyal, u Director (Generation) jong ka West Bengal State Electricity Distributor Company Limited (WBSEDEL) u Subhasankar Debsarma Biswas.
U Subhasankar Debsarma Biswas u la pyni ruh ïa ka Presentation ha u Myntri bad pyntip ruh ïa ki rukom pyntreikam ïa kane ka projek.
Ka jingleit jngoh jong u Myntri ïa ka PPSP ka long ban sngewthuh kum ban weng ïa ka jingkyrduh bording ba la mad da ka jylla Meghalaya.
“Ka jingleit jngoh ïa ka Purulia Pumped Storage Project (PPSP) ka la ai jingmyntoi haduh katta katta. Kane ka projek ka dei kaba nyngkong eh ha ka ri India kaba don ïa ka pumped storage kaba pynmih bording 900 megawatt. Ban kynjoh sha ka thong ba ka Jylla Meghalaya ka donkam ïa ka bording, ngi hap ban sngewthuh bad ban khmih bniah ïa ki tiar kiba lah ban pynmih ïa ka bording,” ong u Mondal.
Ka PPSP ka dei ka Pump Storage Technology ba la pynmih lyngba ka um ne ka Hydel Power Generation. Ka thong jong ka PPSP ka long ban pyndap ïa ka jingkyrduh bording bad ban pyndonkam ïa ka bording ha ka por ba duna slap, bad kan pynduna ruh ïa ka jingdawa. Ka Meghalaya ïa mynta ka pynmih bording na ki phra tylli ki Hydroelectric Power Plant kaba kot 355 megawatta, da kaba thied pat sa 228 megawatt na ki shlem pynmih bording ka sorkar pdeng. Kumba 68% ka tyllong pynmih bording ka dei na ka Hydroelectric, kaba pynlong ïa ka jylla Meghaya kawei na ki jylla kaba pynmih ïa ka bording kaba khuid tam ha ka ri.
U Sanjay Goyal u la pynpaw ba ka sorkar kan wad ïa ki lad ki lynti kumno ban weng ïa ka jingkyrduh bording. Ki don bun tylli ki Hydro Project ha ka jylla bad ka jingleit jngoh ïa ka Purulia ka long ban pyntreikam kumjuh ha kane ka jylla.
