Shillong, Jylliew 27: Ka Press Information Bureau, Ministry of Information & Broadcasting, ka sorkar Pdeng, Shillong ka la pynlong ïa ka Vartalap, ka Media Workshop ha kaba ïa kane la pynlong hapoh ka jingïatreilang bad ka tnat Meghalaya Police halor ki 3 tylli ki Criminal Laws ‘Bharatiya Nyaya Sanhita’ (BNS), ‘Bharatiya Nagarik Suraksha Sanhita’ (BNSS) bad ka ‘Bharatiya Sakshya Adhiniyam’ (BSA) jong u snem 2023 ha Shillong. La ong ba kine ki aiñ kin sdang ban treikam naduh ka 1 tarik jong u bnai Naitung mynta u snem.
Ha ka jingkren u Deputy Inspector General of Police (Eastern Range) Davis NR Marak ula ong ba kine ki aiñ la pynwandur bad la pyntreikam da ka sorkar hadien ba la khmih bniah bha bad ki aiñ runar kiba don mynta ha kaba kane kan nang pynkhlaiñ shuh shuh ïa ki aiñ ba la don lypa.
U la ong ba kine ki aiñ ba thymmai kin long ka jingïarap ha kaba ïadei bad ka criminal justice system jong ka ri. U la ong ba kine ki aiñ ba thymmai kin ïarap ruh ïa ki nongshong shnong ha kiba bun ki liang. U la ong ba ka Bharatiya Nyaya Sanhita (BNS), ka pynleit jingmut halor ka Nyaya ne ka hok bad dei halor kane ba ka jingpynkylla ïa ka kyrteng ka thew sha ka jingpynshitom kaba long hapoh ka IPC ne ka Nyaya ha ka BNS.
U DIG u la ong ba ïa kine ki aiñ la shim lyngba ka Bharatiya Nagarik Suraksha Sanita 2023 ne ka BNSS kaba la bujli ïa ka CrPC.
Haba batai shaphang ka Bharatiya Sakshya Adhiniyam, u Marak u la ong ba ka Indian Evidence Act la pyntreikam naduh u snem 1872 bad la pyndonkam da ki katto katne ki jingpynkylla hynrei ïa ka lEA kam shym la kren halor kane ha ki snem ba la dep. Kane ka aiñ kaba thymmai ka Bharatiya Sakshya Adhiniyam, 2023 ne ka BSA ka ai ka lad ban pyni ïa ki sakhi bad kiwei pat ki jingdonkam.
Ha kane ka jingïasyllok la pynïaid da u Ratul Barua, u News Editor barim ka Meghalaya Guardian and Communication Manager jong ka tnat Forest ka Assam. La donlang ka kong Patricia Mukhim, Editor ka The Shillong Times, Vivek Syiem, IPS, Assistant Inspector General of Police, Shillong, Khalid Khan, Additional Advocate General, Meghalaya, R L Blah, bad Anita Nongkhlaw.
