Shillong, Lber, 22: Ka BJP Meghalaya State Unit ha ka sngi Thohdieng ka la dawa ia u President jong ka Meghalaya Pradesh Congress Committee (MPCC) Bah Vincent H. Pala ba un pynshisha halor ka jingkynnoh ba ka BJP ka kren beiñ ia ki Balang.
“Ka jingkynthoh jong u nongialam ka Congress u Bah Vincent Pala pyrshah ia ka BJP ka dei ka bym nongrim bad khlem ka jingioh jingtip kaba tikna kaba long pynban kum ka jingialap election. Ka BJP Meghalaya ka dawa ia u Bah Pala ban ai kawei ka jingpynshisha bathikna halor ka jingbym burom jong ka BJP ia ki Balang Khristan lane u dei ban weng noh ia ka jingkren khlem da pynshong nongrim,” ong u kyrwoh na ka BJP.
“Ka BJP Meghalaya ka la kdew bad pyni ia kiba bun kiei kiei kiba u Myntri Rangbahduh u la leh, ha kaba u la leit peit bad leit khmih ia ki ingmane bad iakynduh ruh ia ki nongialam Balang Khristan bad pyrto ruh ia ki kam babha ba la leh da ki nongialam jong ka party. Ka BJP ka pynkynmaw ia u Bah Pala ba kumno ha ki por jingleh kmen Khrismas la pynlong ia ki jingialang ha iingsah u Myntri Rangbahduh u Narendra Modi bad ia ki jingai jingkren jong u, ki jingiasoh ba sngewtynnat ia u Jisu Khrist bad ia ki jinghikai jong u. U Myntri Rangbah Duh u la ong ruh ba u Jisu Khrist u la trei bad lum ban pynlong ia ka imlang sahlang kaba mar ryngkat, ba katjuh bad ba ai ia ka kajuh ka hok ia baroh. U la ban ruh ba kine ki jingtrei ne ki kam jong u Jisu Khrist ki long ki jingshai ba shat thaba na bynta ka roi ka par jong ka ri. La bynrap shuh shuh ba uno na ki nongialam Congress uba ju kren bad ai kum kine ki jingkren, ki jingkynpham jong u Jisu Khrist bad ia ka khubor Blei jong u? Kane ka long ka jingkylli ba ka seng ka kwah ba u Bah Pala un jubab,” la dawa ka BJP.
Ka BJP Meghalaya ka pyni bad kdew ruh ba ha ki por lehkmen Khrismas ki nongialam jong ka Party ba kynthup ia u Bah A.L.Hek bad kiwei kiwei ki la pynlong ki jingleh kmen Khrismas na bynta ki khynnah bad kiba duna ha ka ioh ka kot, bad kane ka la pynsaphriang ia ka jingkmen jong kane ka samoi kylleng la kylleng, kaba long pyrshah bha ia ka jingthaw bad shna khana ba la kren kum u Bah Vincent Pala, la kynthoh ka BJP.
U Nongai ktien ka BJP Meghalaya Bah Mariahom Kharkrang u la ong, “ka Congress ka la sngew tikna ba ka lad jingjop jong ka ka la nang troiñ bad hair arsut suki suki katba nang mih ki sngi bad ka BJP pat ka la nang kiew irat. Kum kine ki jingkynthoh ki dei tang ki buit bad ki lad ki lynti ban pynngeit, pynkohnguh ne ialam bakla ia u paidbah ban pyrshang ban ioh da ki vote sngewsynei ban ioh jingkyrshan. Ki paidbah ki la iohi naduh ki por ba ladep bad kin jied bad kyrshan beit ia ka jingsynshar ba hok, kin kyrshan ia u kyrtong uba ka BJP ka la jied na ka bynta ka jingjied nongmihkhmat ka ban sa long shen.”
