Mawkyrwat, Jymmang, 09: Katba nangmih ki sngi ka jingkharoi jong ki nongdih drok kam long shuh tang ha sor Shillong hynrei u drok u la rung wat sha ki shnong nongkyndong jong ka Jylla. Ka jingkharoi jong ki nongdih drok ka la wanrah ia ka jingjyllei ki kam sniew ha ka thain Mawkyrwat kat haduh ba ka la pynsyier mynsiem ia ki paidbah nongshong shnong namar ka jingjyllei ki kam runar ruser bad ki kam tuh kam thiem.
Ha ka janmiet sngi Balang, ki dkhot jong ka Hynñiewtrep Integrated Territorial Organisation (HITO), South West Khasi Hills District Unit ryngkat ka jingiatreilang jong ki Zone bad ki Unit hapoh ka jingialam jong u President ka seng u Bah Paullius Thyrniang ki la hiar ban khynra ha iew Mawkyrwat ha kaba ki la iohbat haduh san ngut ki samla kiba la im kyrni ban dih drok.
Na ka met jong kine ki san ngut, ki dkhot ka seng ki la ioh kurup ia u drok, u Ganja, ka pisa bad ki thyrnia injek.
Hadien ba la ioh bat ia kine ki nongdih drok ka Seng ka la aiti noh sha ki Pulit jong ka Mawkyrwat Police Station ba kan leh ia kaba donkam katkum ki kyndon jong ka NDPS Act.
Ha ka jingiakren bad ki lad pathai khubor, u samla Paullius thyrniang u la ong ba kane ka dei tang ka jingsdang bad ka seng kan dang iai pynjur ban pynlong ia ka jingkhynra na ka por sha ka por.
U la kyntu ia ki bor Pulit ba kin shimkhia halor kane bad u la kyntu ruh ia ki kiwei de ki sengbhalang, ki Seng Kynthei, ki bor synshar shnong ba kin iatreilang khnang ban rat dyngkhong ia kine ki jingsniew hapoh ka South West Khasi Hills District.
