Shillong, Naiwieng, 01: Na ka daw ka jingïatakhuh ki sngi thoh eksamin jong ka Meghalaya Public Service Commission (MPSC) bad ka District Selection Committee (DSC) West Jaintia Hills, ha ka sngi Thohdieng ki nongïalam jong ka Jaiñtia Students Union (JSU) Shillong Circle hapoh ka jingïalam jong u Adviser u Bah A. Suchiang ki la leit ban ïa kynduh ïa u Chairman jong ka MPSC u Bah D. Langstang ha ophis treikam jong ka Commission.
Ha kane ka jingïakynduh, ka JSU ka lah pynpaw ïa ka jingbymhun ha ka rukom buh ka Comission ïa ki sngi ban thoh eksamin namarba ki ïa tyngkhuh bad ki eksamin ka DSC.
Na ka liang jong ka JSU ka la kyrpad ïa ka Commission ba kan peit bniah ïa kine ka jingeh bad ba kam dei shuh ban dang jia nangne shakhmat, namar ka long ka jingduhnong jong ki nongthep kam.
“Lada ka dang ïai jia kumne nangne shakhmat na ka liang ka JSU kam banse ban leh da kaba tyngeh na ka bynta ka jingbha ïa ki nongthep kam’, la ong u Adviser.
Ka MPSC bad ki DSC ki dei ban ïa treilang ban lait na ki kynrum kynram kiba kum kine, u la bynrap.
