Shillong, Lber, 14: Ka kynhun kaba don hynriew ngut ki dkhot jong ka Meghalaya Pradesh Youth Congress (MPYC) ba la ïalam da u President Bah Adrian Chyne Mylliem ki la pynlong ïa ka jingïakhih ha baroh kawei ka jylla ban pyrshah ïa ka jingpyntreikam ïa ka Citizenship Amendment Act, 2019.
Ha kane ka jingïakhih la sakhi ba tang 6 ngut ki samla jong ka Meghalaya Pradesh Youth Congress (MPYC) ki la leit ban rah plakad hakhmat ka ophis treikam jong ka BJP ha nongbah Shillong ban pyrshah ïa ka jingpyntreikam jong ka Sorkar NDA ba la ïalam da ka BJP ïa ka CAA kaba la pynmih ïa ka Rule ha ka Lah sngi u Blei mynta ka taiew.
U Bah Adrian ha ka jingïakren bad ki lad pathai khubor u la ong ba ka Congress ka ieng pyrshah ïa ka jingpyntreikam ïa ka CAA ha ka ri baroh kawei shwa ban wan ka elekshon Lok Sabha khnang ban phiah arliang ïa ki nongshong shnong jong ka ri ha ka kyrteng ka niam.
Une u nongïalam ka MPYC u la pynrem jur ïa kane ka jingleh jong ka BJP bad ong ruh ba ki paidbah ka ri baroh kawei ki dei ban pyrshah jur ïa kane ka buit jong ka BJP.
