Shilllong, Jymmang, 16: Ka Hynñiewtrep Youths Council (HYC) ha ka sngi Palei ka la phah da ka jingthoh sha u Myntri ka tnat Pule Puthi ka Sorkar Jylla u Rakkam A. Sangma ban dawa ba dei ban thung da ka jingtohkit hadien ba la mih ki kynrum kynram ha ka jingpynlong ïa ka eksamin Central University Entrance Test (CUET) ha skulbah North Eastern Hills University (NEHU) ha ka sngi Balang.
“Dei ban thung da ka jingtohkit ha kaba ïadei bad ka jingbym kitkhlieh, ka jingbymsngew briew, ka jingmih ka kynrum kynram ha ka jingpynlong ïa ka eksamin CUET ha skulbah NEHU ha ka 15-05-2024. Ki nongtrei bad ki ophisar kiba wanrah ïa kane ka jingbakla bym lah ban map shuh bad kaba la pynsuhsat ïa ki samla pule ka jylla Meghalaya ki dei ban shim ïa ka jingkitkhlieh namar ka jingbym kitkhia ïa ka kamram. Ka Sorkar ka dei ban pynthikna ba kum kine ki jingjia kim dei shuh ban dang jia nangne shakhmat,” la ong ka seng ha ka dorkhas ba la phah sha u Myntri ka tnat Pule Puthi ba la soi da u Asst. Education Secretary u Banpynbiang Riang bad u Joint Secretary u Mandor Diengdoh.
Ka seng ka la dawa ruh ïa ka Sorkar ban thung da u Nodal Officer ha ka jylla uba la lah ban ïatreikam bad ka National Testing Agency (NTA).
Nalorkata, ka seng ka la dawa ruh ban buh da u Helpline Number ban ïarap ïa ki samla pule kiba ïakhun ïa ka eksamin CUET. “Ka Sorkar ka dei ban ïakren bad ka NTA ba kam dei shuh ban dang don ka jingleh thurmur nangne shakhmat,” la bynrap ka seng.
“La pyntip ruh sha ngi ba ki don katto katne ki Papers ba la jied da ki samla pule kiba jah ha ka Admit Card. Ngi kwah ba ïa kane ka jingjia dei ban tih bniah mardor khnang ba kan ym pynkulmar jingmut ïa ki samla pule,” la ong ka seng.
“Namar ka jingpynlong ïa ka eksamin CUET ka jylla khlem da pynkhreh bha, bun na ki samla pule kim shym la lah ban leh bha na ka daw ki jingthurmur ha ka rukom pynïaid. Ngi kyrpad ïa ka Sorkar Jylla ba kan pynthikna ba ki shlem pule ha Meghalaya ki dei ban don ïa ki tiar ki tiar khnang ba ki samla pule kin dup lah ban pas ïa ka eksamin CUET,” la bynrap ka seng.
