Shillong, Jylliew, 23: Ka Executive Committee ba la ialam da ka Khasi Hills Democratic Front ha Khasi Hills Autonomous District Council (KHADC) ka la shim ia ka rai ban shimkhia bha ia ka jingeh jong ki paidbah ha khappud kiba iakynduh jingeh na ka jingiakajia pud hapdeng ka Jylla Meghalaya bad ka Jylla Assam kiba dang hap hapoh u pud u sam jong ka KHADC.
Ka Sorkar Meghalaya bad ka Sorkar Assam ki la pyndep ia ka jingiapynbeit pud ha ka wat kaba nyngkong bad mynta ka kynti la pynsdang sa ia ka wat kaba ar hadien ba la thaw biang ia ki Regional Committee ban iapynbeit sa ia ki hynriew tylli ki jaka kiba dang don hapdeng ka jingiakajia pud.
“Na ka liang jong ngi, tang shu dep ka Dorbar Mang Tyngka ngi don ka jingthmu ban leit jngoh ia kito ki shnong kiba shah pynwit ha ka leit ka wan, kiba shah pynthud ha ka leit rep leit riang, ka kam khaii bad kiwei kiwei bad kiba shah pynthud ha ki kam pynroi,” u la ong.
“Khnang ban tip ia ki bor kiba wan pynthud, tad ynda la iakynduh ia ki nongshong shnong ngin sa ioh jingshai namarba haduh mynta ngim pat ioh jingshai bha,” u la ong bad bynrap, “ha ka sngi ba la jied ia u CEM ba thymmai, ngi la ong ba daleilei ruh em kane ka EC ba thymmai kan ym ailad ia ka Sorkar Assam lyngba ki bor synshar district ba kin pynwit bad ba kin pynshongsyier ia ki paidbah ha khappud.”
“Nga kwah ban phah ia u kyrwoh uba shai sha ki paidbah ha khappud ba kane ka EC bathymmai kan long ka jingshngain na ka bynta jong ki. Baroh ngi don ka jingsngewkhia ia kane ka kam bad ngin nym ieh ia ki briew kiba sah ha khappud kiba iakynduh ia ki jingeh,” la ai mynsiem u Bah Pyniaid ia ki paidbah kiba sah ha ki shnong khappud.
