Shillong, Jylliew, 23: Ka Regional Committee na ka bynta ka Ribhoi District ia kaba la khlieh da u Symbud Myntri Rangbah Bah Prestone Tynsong kum u Chairman ka la rai ban iakynduh bad ka Regional Committee na ka jylla Assam ha u bnai Naitung, 2023 ban iathir iatai sani ha kaba iadei bad ka jingpynbeit ia ki jaka kiba don hapdeng ka jingiakajia pud ha khappud ka Jylla Assam bad ka them Ribhoi, kaba dang hap hapoh ka Jylla Meghalaya.
Ha ka jingiakren bad ki lad pathai khubor, u Bah Prestone Tynsong, u la ong ba ka jingialang kan iakren ia ki shnong kiba don ha ka jingiakajia pud, kata, ha ka shnong Deshdomrea, Borduar, Nongwah-Mawtamur bad ha ka thain Block-2.
Haba kylli, u Bah Prestone u la iathuh ba ki kyndon iakren jong ka Regional Committee ki dei hi kijuh kumba la long ha ka jingiakren pynbeit pud ha ka wat kaba nyngkong.
“Ngi la iakren ruh halor ka jingdawa jong ki paidbah jong ka thain Block-2 ban pynphai noh ia ki jaka sha ka Jylla Meghalaya. Ngi don ia ki dulir bad ngin sa iakren,” u la ong.
U la ong ruh ba ka jingkylli halor ka jingmih ki jingiakajia pud ha ka thaiñ Block-1 bad Block-2 kam don satia hynrei ka jingdawa ka long ban pynioh biang ia kine ki jaka katkum ka Notification ba la pynmih ha u snem 1951 ba la pynmih da ka Sorkar Assam.
“Ka jingiakren jong ngi ia ka Block-1 bad Block-2 ka long ba kin (Sorkar Assam) pynphai biang sha ka Jylla Meghalaya khamtam ia ki shnong kiba kham bun ki nongshong shnong ki dei ki doh ki snam jong ngi,” la ong shuh shuh u Bah Prestone.
