Rai ban bteng ka jingkhynra Trading License ïa ki bar jylla
Shillong, Jylliew, 23: Ka Khasi Hills Democratic Front hapoh ka jingialam jong u Bah Pyniaid Sing Syiem kum u Chief Executive Member kaba dang shu shimti ia ka Executive Committee kaba thymmai hapoh ka Khasi Hills Autonomous District Council ka la rai ban pynlong biang ia ka Dorbar Mang Tyngka jong ka Council ka ban sdang naduh ka 24 tarik haduh ka 28 tarik u Jylliew, 2023.
Ha ka jingiakren bad ki lad pathai khubor ha ka sngi Thohdieng u Bah Pyniaid u la ong ba ha kane ka dorbar yn sa wanrah ruh ia ka Rule kaba la tip kum ka Khasi Hills Autonomous District Council Service Amendment Rules 2023 ban pynbeit thymmai ia ka rta rungkam jong kino kino ki nongthepkam ka ban long beit 37 kumba leh da ka Sorkar Jylla.
Shuh shuh u la iathuh ba ka Executive Committee kan wanrah ruh ia ka jingpynbeit thymmai ba nyngkong eh ha Khasi Hills Automous District (Protection of Khasi Traditional Medicine) 2023 bad ia ka Bill kaba iadei bad ka Khasi Hills Autonomous District Members Pension Bill kaba dei ka Repeal Bill, 2023 ka Executive Committee ka la rai ban pynsangeh shwa shipor ban bishar bniah bin pa bin da ka Select Committee.
U la pyntip ruh ba ka Executive Committee jong ka Khasi Hills Autonomous District Council ka la shim ia ka rai ban pan jaka na ka Sorkar Jylla ha New Shillong na ka bynta ban pynkynriah noh ia ka ophis treikam jong ka District Council na ka jaka treikam kaba don mynta.
“Kumba ka long mynta kane ka jaka treikam ka la khapngiah shaba bha bad ka la pynwit bha ia ka jingtreikam jong kiba bun. Kumba phi tip ka KHADC ka don lai tylli shnat treikam ba kynthup ia ka Executive, ka Legislative bad ka Judiciary,” u la ong.
U la iathuh ba kane ka jingthmu ban pan jaka na ka Sorkar ha New Shillong ka long ban pynsuk ia ki paidbah ha ka leit ka wan hadien habud.
Ka Executive Committee ka la rai ban bteng ia ka jingpyntreikam ia ka Trading by Non-Tribal Regulation Act ban khynra ia ki bar jylla kiba wan khaii hapoh u pud u sam jong ka KHADC, la ka long ia ki nongkhaii kiba rit ne kiba heh bad ki bym don ia ka Trading License yn shu phah khang lut ia ki jingtreikam jong ki.
“Kane ka EC kan long kaba pyrkhing bha ia ki jingkhynra ia ki bar jylla kiba wan leh ia ki kam khaii pateng ki bym don ia ki kot ki sla kiba biang bad ki bym burom ia ka Council ban pan ia ki laisen,” u la bynrap.
