Shillong, Jymmang, 24: Sa shisien, ka Sherwood School, Tura, West Garo Hills ka la long ka skul kaba don ha kyrdan kaba hakhlieh duh ha ka jingpynbna ïa ka Secondary School Leaving Certificate (SSLC) ba la pynbna da ka Meghalaya Board of School Education (MBOSE) ha ka sngi Thohdieng.
U Anuj Chetry na ka Sherwood School, Tura u la long u lahduh ha ka result SSLC mynta u snem da kaba ïoh 575 mark.
Katba ka Aleytheia Syiemlieh na St Margaret’s Higher Secondary School, Shillong kaba la ïoh 574 mark ka la wan ha ka kyrdan kaba ar bad u Congenial Kharsahnoh na Christian Academy, Shillong uba la ïoh 571 u la ïoh ha kyrdan kaba lai.
Laiphew saw ngut kiwei pat ki khynnah na ki skul bapher bapher ki la ïoh rung ha ka thup Top-20 jong ka result SSLC mynta u snem.
Haba bishar ïa ka result jong ka SSLC ha baroh kawei ka jylla, ka jingpas jong ki khynnah ka long 55.80 percent haba ïanujor bad u snem baladep kaba long 51.93 percent.
Tang 30,207 hajar na ki 54,134 hajar ngut ki khynnah skul na ki 679 tylli ki skul ki la pas ïa ka eksamin SSLC kaba la long ha ki 157 tylli Centre.
Ka West Jaintia District ka dei ka District kaba bun tam ki khynnah skul kiba pas kaba long 78.34 percent katba ka North Garo Hills ka dei ka District kaba duna tam ki khynnah kiba pas kaba long tang 23.88 percent ha ka eksamin SSLC.
