Shillong, Naitung, 30: Ka Meghalaya College Teachers’ Association (MCTA) ka la rai ban ‘boycott’ ne ban ym shim klas ha ka First Semester kum ka dak ban pyrshah ïa ka jingleh bym suidñiew jong ka North Eastern Hill University (NEHU) ha kaba ïadei bad ka jingshim rai ban pyntreikam noh ïa ka National Education Police (NEP), 2020 ha ka Jylla.
Ïa kane ka rai la shim ha ka jingïalang bakyrkieh jong ka Association kaba la long ha ka sngi Saitjaiñ.
Ha u kyrwoh, ka MCTA ka la ong, “(ngi) pynrem jur ïa ka jingeh dohnud, ka jingbym don jingsngew bad ka jingleh mutlop da ki bor pynïaid jong ka NEHU, khamtam u Vice Chancellor, ban khynñiat beit shakhmat ban pyntreikam ïa ka NEP 2020 khlem ka jingmynjur jong ka Academic Council.”
Ha ka jingïalang ba kyrkieh ba la shu pynlong Online ha ka 29 tarik mynta u bnai, hadien ka jingïathir ïatai kaba bniah halor ka jingdon jingsgngew jong ki bor pynïaid ka NEHU khamtam eh u Vice Chancellor, Prof Prabha Shankar Shukla, la rai da kawei ka sur ban pynlong ïa ka Non Cooperation Movement pyrshah ïa ka NEHU da kaba sangeh shim klas ha ka First Semester jong ka FYUP, la ong ka Assocation.
“Namarkata, la pyntip hangne sha baroh ki dkhot jong ka MCTA, naduh ka 1 tarik, Nailar, 2023, tad haduh ban da pynbna da kumwei pat, baroh ki dkhot ki dei ban ‘boycott’ ïa ki klas jong ka First Semester. Shuh shuh, la bthah ïa ki dkhot ban kyntait ïa baroh ki jingshah pynkhamti kam kiba ïadei bad ka jingpyntreikam mardor ïa ka NEP 2020,” la ong shuh shuh u kyrwoh.
Ha kaba ïadei bad ka 3rd bad 5th Semester, ki klas kin long beit kumba ju long khlem kano kano ka jingpynthud. Namarkata, la bthah ïa ki dkhot ba kin leit shim ïa ki klas bad ban pyndep ïa ki lynnong kot katkum ka por ba la buh, la bthah u kyrwoh.
Shuh shuh ka MCTA, ka la pynpaw, “ngi sngewthuh ïa ki jingtynjuh ba kane ka rai ba la shim kan buh jingeh, hynrei, kumba ka long ha ki por ba la leit noh, phi la aiti na ka bynta ki kam jong ka Association, ka long kaba donkam eh ba ngin ïa tylli lang kawei khnang ban pynthikna ba ki shlem ai jinghikai jong ngi kin ïoh ïa ka burom bad ruh ban ïada ïa ka bha ka miat jong ki kynhun bapher bapher, khamtam eh ki samla pule.”
