Shillong, Nohprah, 18: Ka samla Ibanriakor Lyngkhoi na ka shnong Weiloi, East Khasi Hills kaba hap hapoh Mawsynram Constituency ha ka sngi U Blei ka la shah pynkup burom ha ka Weiloi Sport Club hadien ba ka ioh ia ka jingjop ha ka jingmareh Marathon ba la tip kum ka Tata Steel Kolkata 25K.
Ia kane ka jingpynkup burom la pynlong ha ISBT, Mawiongrim, Shillong hadien ba ka la wanphai na nongbah Kolkata, West Bengal ha ka Lah Sngi u Blei ha kaba la sakhi lang da u Adviser jong ka Weiloi Sports Club u Bah Presius Kharnaior.Kane ka long ka sien banyngkong eh ia ka samla Ibanriakor Lyngkhoi kaba la 20 snem ka rta ban leit iashim bynta ha ka jingiakob mareh Marathon shabar jong ka Jylla Meghalaya bad poi ha ka kyrdan ba nyngkong napdeng ki nongiashim bynta kiba ha ka rta kaba 18 haduh 24 snem ha ka Open 25k da kaba pyndep ia ka jingmareh ha ka 1 kynta, 58 minit, 19 sekhon.
