Shillong, Naitung, 22: Ka long kaei re kaei kaba pynkyndit haduh katta katta ïa ka Hynniewtrep Youths Council (HYC) Mawthadraishan Circle ban sakhi ïa ka jingbsuh khlieh ki nongdih drok sa sha ki shnong nongkyndong jong ka jylla Meghalaya bad kaba la pynsngewkhia haduh katta katta ïa kiba bun ki longiing longsem.
Kane ka la jia hapoh ka shnong Mawthadraishan, Eastern West Khasi Hills District.
Ki dkhot jong ka HYC ba la lamkhmat da u President u samla Shembor Langrin kiba la ïoh ïa ka jingtip kaba bniah ha ka miet sngi Saitjaiñ jong ka taiew baladep ha ka jingpynap shrip ki la ïoh ban kurup ïa u drok bad ïa ki thyrnia injekshon na uwei u samla. Ka jingïoh ban kurup ïa u drok ka dei da ka jingïatreilang hapdeng ka HYC bad ki bahaing hasem jong u samla uba la im kyrni ha ka jingdrok drok.
Ïa u drok bad ïa ki thyrnia injek kiba la ïoh kurup na une u samla ki dkhot jong ka HYC ki la pynjulor da kaba thang noh da ka ding.
Hadien kane, ka seng ka la ïasyllok bad ki bahaing hasem bad ïa une u samla uba la im kyrni ha ka jingdih drok la phah sumar noh sha ka Rehabilitation Centre.
Ka HYC Mawthadraishan Circle ka kyrpad ïa ki nongïalam shnong, ki sengtrei monsngewbha bad khamtam eh ïa ki bor jong ka aiñ ba kim dei ban khein sting hynrei ban peitngor hapoh ka thaiñ Mawthadraishan bad ka Distict Eastern West hi baroh kawei khang ba u drok um ïoh ban rung hapoh ka thaiñ ban pynjot ïa ka jingim jong ki samla.
