Shillong, Nailar, 08: Ka Composite Regional Centre for Skill Development, Rehabilitation and Empowerment of Persons with Disabilities, hapoh ka jingpynïaid jong ka Administrative Control of SVNIRTAR Cuttack, Odisha, ka tnat Empowerment of Persons with Disabilities (Divyangjan), ka tnat Social Justice & Empowerment, Sorkar India, ka la sam ïa ki tiar ai jingïarap sha ki briew kiba don jingduna ha ki dkhotmet ha ka jingïalang kaba la long ha Soso Tham Auditorium, State Central Library ha ka sngi Palei.
Kane ka prokram ka la peit ïa ki jingdonkam ha ka koit ka khiah bad ha ka liang ki tiar ai jingïarap, kaba pyni ïa ka jingkut jingmut na ka bynta ka jingai bynta ïa baroh bad ruh ka jingkyrshan ha ka imlang sahlang.
U Myntri ka tnat Social Welfare ka Sorkar Jylla Bah Paul Lyngdoh u la long u kongsan bad u Commissioner & Secretary ka Sorkar Jylla u Pravin Bakshi u la long kum u nongshah khot kyrpang.
Ha kajuh ka por, la don ka jingsam ïa ki tiar ai jingïarap ïa kiba la saindur ban pynsuk ïa ka jingim jong kito kiba don jingduna ha ki dkhot met. 125 tylli ki tiar kum ki Smart Phone, Auxiliary Crutch, Teaching Learning Material (TLM Kit), Rollator, Hearing aid, CP Chair, ki jingshan, ki Wheelchair, Android Tablet ki dei kiba la sam ïa kito kiba donkam ïa kine ki tiar. Kane ka jingai jingkyrshan ka thmu ban pynduna ïa ki jingeh ba ki longiing ki ïakynduh man ka sngi.
U Bah Paul Lyngdoh haba kren kum u kongsan, u la ong, “ka thong jong ngi mynta ka sngi ka dei ban pynthikna ba baroh ki ïoh bynta ha kaba baroh ki briew, khlem da thew ïa ki sap jong ki, ki lah ban ïoh ïa ki jingtip ba ki donkam bad ruh ki jingkyrshan. Ngi sngewkmen shisha ba ngi la ïoh ban nohsynniang sha ka bha ka miat bad ka jinglaitluid jong kito ha ka imlang sahlang kiba don jingduna ha ki dkhot met.”
U la ïaroh ruh ïa ka jingtrei shitom jong ki nongtrei ka CRC- Shillong bad u la kular ba un ai ka jingïatreilang ha ki kam ba kan dang leh nangne shakhmat.
U Dr. Ram Shakal Sahani, Director, CRC- Shillong u la pyntip ba ka ophis CRC – Shillong ka la trei na ka bynta ka bha ka miat jong kito kiba don jingduna ha ki dkhot met naduh ka 19 tarik u Naitung 2021 ha Meghalaya. U la ïaroh ïa ka jingïatreilang jong ka Tnat Social Welfare, jong ka Sorkar Meghalaya ban pynlong ïa ki prokram bapher bapher. U la ong ruh ba lyngba ka jingkyrshan na kine ki tiar ba la sam mynta ka sngi, kito kiba don jingduna ha ki dkhot met ki lah ban ïarap ïalade ban ïoh ïa ka pule puthi kaba bha.
Ka jingjop jong kane ka prokram ka pyni ïa ka jingkut jingmut jong ka ophis CRC Shillong ban pyndap ïa ki jingdonkam jong kito kiba don jingduna ha ki dkhot met lyngba ki kam kiba kyrpang bad ka jingai jingshakri da ka jingsngewlem. Kane ka prokram sam tiar ka long kum ka nuksa na ka bynta ki kam nangne shakhmat kiba thmu ban plié lad ïa baroh ban ïoh bynta lang bad ruh ka jingkyrshan ha ka imlang sahlang.
