Shillong, Nailar, 26: Da ka jingshimkhia jong u MDC ka Mawkhar Pynthorumkhrah Constituency u Bah Pynshngain N. Syiem, ka Dorbar Shnong Lum shyiap ha ka sngi Saitjaiñ 2023 ka la ioh ia ka trok kit ñiut ba la pyllait paidbah ha ka jingialang kaba lyngkot ha Taxi Stand Lumshyiap.
U Bah Pynshngaiñ Syiem uba long ruh u Deputy Chief Executive Member (Dy. CEM) jong ka Khasi Hills Autonomous District Council (KHADC) uba la long kum u Kongsan ha kane ka sngi, u la iathuh ba ia kane ka trok kit niut la bei pisa ban thied da ka District Council lyngba ka Tied Grant jong u snem 2020-21 na ka Finance Commission.
Ha ka jingot ribbon ia kane ka trok kit niut, la sakhi lang da u Rangbah Shnong u Bah Phira Khongphai, u Secretary Shnong u Dr Khampher Phawa, ki nongkitkam jong ka Executive Committee, ka President jong ka Seng Kynthei ka Kong Marylin Pathaw, u President ka Seng Samla u samla Khrawpyrkhad Mynsong lem bad ki paidbah nongshong jong ka shnong Lumshyiap.
U Bah Pynshngaiñ Syiem haba kren ha kane ka sngi u la pynpaw ba ka jingpynioh jong u ia kane ka trok ban kit ia ki ñiut na ki thliew ing jong ki nongshong shnong Lumshyiap ka long hadien ba ki nongialam ka shnong ki la pan jingiarap na u namar ba ka kali kaba rim kam lah shuh ban treikam hadien ba ka la don kumba 11 snem tam eiei. U la kyntu ia ki nongpyniaid ia kane ka kali ba kin pyndonkam hok katkum ka jingdonkam bad ban ban ym pyndonkam bakla lane na ka bynta ka jingmyntoi shimet jongno re jongno.
