Shillong, Nohprah, 20: Ka tnat Kam Pohing jong ka Sorkar Jylla ha ka sngi baar ka la pynmih ia ka hukum lyngba u Secretary Bah Cyril VD Diengdoh ban pynkynriah kam ia u Superintendent of Police jong ka East Jaintia Hills District u Jagpal Singh Dhanoa kum u Superintendent of Police jong ka Ri-Bhoi District, katba ia u Giri Prasad M. uba dei u Superintendent of Police ba mynta jong ka Ri Bhoi District la pynkynriah kum u Superintendent of Police jong ka East Jaintia Hills District.
Kane ka jingpynkynriah kam ia u Jagpal Singh Dhanoa na East Jaiñtia Hills District ka la iatakhuh lang bad ka hukum ba la pynmih da ka Iingbishar Meghalaya High Court kaba la pynmih ha ka sngi baar kaba la bthah ia ka tnat Kam Pohing bad ia ka ophis u Director General of Police (DGP) ban pynkynriahkam mardor ia u Jagpal Singh Dhanoa halor ka jingbym lah jong u ban tehlakam ia ka jingtih dewiong be-aiñ ha East Jaintia Hills District.
Ka Iingbishar ka la shim ia kane ka rai hadien ba la shong bishar ia ka PIL No. 2/2022 kaba iadei bad ka jingujor Suo Motu halor ka kam tih dewiong beaiñ ha ka jylla. Ka Iingbishar ka la pynpaw ba Jagpal Singh Dhanao la pyntip ba ula shakri ha East Jaintia Hills naduh u snem 2021, bad kumta u la dei ban tip bha ha kaba iadei bad ka jinglong jingman hapoh ka district.
“Ka 19th interim report ka pynpaw ba u Dhanoa um lah ban tehlakam ha kaba iadei bad kane ka kam beaiñ,” la ong ka Iingbishar. Ka Iingbishar ka la ailad ruh ia ka Sorkar Jylla ban ai jubab halor ka 19th Interim Report bad ia mynta ka Iingbishar kam shim satia ia ki sienjam bad ki jingpynkhein kyndon.
Ha kaba iadei bad ka jingpynkynriah kam, u C.V.S Reddy, uba dei mynta u Deputy Inspector General of Police (WR), Tura u la shah pynkynriah kum u Deputy Inspector General of Police, CID, Shillong, u Siddharth Kumar Ambedkar uba dei u Superintendent of Police, East Garo Hills District u la shah pynkynriah ban shimti kum u Commandant, 5th MLP Bn, Samanda, u Jagpal Singh Dhanoa uba dei u Superintendent of Police jong ka East Jaintia Hills District u la shah pynkynriah kum u Superintendent of Police jong ka Ri-Bhoi District. U Giri Prasad M, uba dei u Superintendent of Police jong ka Ri-Bhoi District u la shah pynkynriah ban shimti kum u Superintendent of Police jong ka East Jaintia Hills District, Khliehriat.
Saw ngut ki ophisar IPS kiba la pyndep ia ka jingshah hikai pyntbit ha SVP, NPA, Hyderabad, ba kynthup ia u Naman Kumar la thung kum u Sub Divisional Police Officer (SDPO), Raksamgre, u Dewansh Pandey, kum u Sub Divisional Police Officer (SDPO), Amlarem, u Ishan Gupta kum u Sub Divisional Police Officer (SDP0), Dadenggre bad u Ashish kum u Sub Divisional Police Officer(SDPO), Sadar, Shillong.
U Bah Stephen A. Rynjah, uba dei u Superintendent of Police, Anti Infiltration Directorate, Tura la shah pynkynriah kam kum u Superintendent of Police, East Garo Hills District, u Billy Graham Marak, uba dei u Commandant jong ka 5th MLP Bn, Samanda u la shah pynkynriah kum u Superintendent of Police, Anti Infiltration Directorate, Tura, u Bah Banraplang Jyrwa, uba dei u Additional Superintendent of Police jong ka East Jaintia Hills u la shah pynkynriah kum u Deputy Commandant jong ka 6th MLP Bn, Umran. U Bah Baniateilang Diengngan uba dei u Deputy Commandant jong ka 6th MLP Bn, Umran u la shah pynkynriah kum u Additional Superintendent of Police jong ka East Jaintia Hills.
U Bah Gilbert Amrstrong Lyngdoh Marshillong, uba dei u Assistant Commandant jong ka 3rd MLP Bn, Sahbsein u la sahh pynkynriah kum u Assistant Commandant jong ka 4th MLP Bn, Sohpian, katba u Nawab Thorem uba dei u Deputy Superintendent of Police, CID, Shillong u la shah pynkynriah kum u Deputy Superintendent of Police, Anti Infiltration Directorate, Shillong.
