Nongstoin Jylliew 02 : Ha ka 31 tarik u Jymmang 2023, ki pulit ki la ioh ia ka jingujor na kawei ka longkmie kaba shong basah ha ka shnong Umsaw – Myriaw Syiemship, West Khasi Hills District. Katei ka longkmie ka la ujor ba u khun jong ka, u la shah batbor ha uwei u briew uba la tip kyrteng kum u Mebanrilang Syiem Shangoi uba dei na ka shnong Umsaw Mawlangsu. Kane ka jingshah batbor ka la jia naduh u snem 2022 hynrei ka kmie ka ioh jingtip tad haduh ka 29 tarik u Jymmang 2023 hadien ba u khun u la pyntip sha ka. Ki pulit ki la kem ia utei u briew bad mynta u don ha Shillong Jail.
Hynrei katkum ki khubor kiba la ioh lum la iathuh ba hadien kane ka jingujor ejahar ki la don bun ngut kiba la wan mih shakhmat ban ujor pyrshah ia une u briew bad kumba ka long mynta ki la don haduh 20 ngut tam ki khynnah rit kiba la shah batbor ha u bad kiba bun na kiba shah batbor ki dei ki khynnah shynrang kiba hapoh ka 12 snem ka rta bad ki don ruh katto katne ngut ki kynthei.
