Tura, Jylliew 03 2023 U Myntri Rangbah Conrad K Sangma hynne ka sngi u la shong ia ka jingialang bad ki 18 tylli ki sengbhalang nalor ki riew paidbah ha ka jingialang kaba la pynlong ha Tura, West Garo Hills.
Ka jingthmu jong katei ka jingialang ka long ban pynshai bad ioh jingshai shuh shuh haba iadei bad ka Reservation Roster.
Ha katei ka jingialang la wan ban donlang ruh naduh u Symbud Myntri Rangbah Bah Prestone Tynsong, nangta ka Myntri Sorkar, Dr. Ampareen Lyngdoh, Chief Secretary Bah DP Wahlang bad ruh u Bah HM Shangpliang MLA barim bad kiwei kiwei nalor ki kynhun bad ki seng ba paw na rilum Garo kynthup naduh u Augustine Marak na ka GNC bad kiwei kiwei.
Ki nongwan shim bynta ha katei ka jingialang ki ioh ruh ban pan jingshai shuh shuh haba iadei bad ka Reservation Roster bad ruh ban pyntikna ia baroh ki nongshim bynta ba kin sngewthuh shai ia ka bad ka jingmut jong ka.
Hadien ka jingialang u Myntri Rangbah haba kren bad ki lad pathai khubor u la ong, Ha ka jingialang mynta ka sngi nalor ki Myntri Sorkar bad ruh u Chief Secretary bad ki ophisar ki la don kumba 18 tylli ki seng bad ki kynhun bapher bapher kiba la khot ban shim bynta ha kane ka jingialang. Ka jingthmu jong kane ka jingialang ka long ban pynsngewthuh bad pynshai kdar halor ka Roster System bad kumno ka treikam. Kumta hadien ba ki la iohi ia ka presentation, ki la mih bun ki jingkylli bad bun na ki la dep ban pynshai bad jubab bad bun ki dkhot ki la hun bad pdiang ia ka. Kumta, ngin sa shong biang ha ka kynhun Myntri ban pyniaid ia ka kam shakhmat haba iadei bad ka Roster.
