Shillong, Jymmang, 02: Kawei ka kali Sorkar ka la ingkhong hadien ba ka la wiang ding ha ki runar ki bym lah ban ithuh durkhmat ha ka miet sngi Palei hajan ka ophis Water Resources ha Dhankheti, Shillong.
Kane ka kali Bolero kaba don ïa u nombar ML01-A-0175 jong ka tnat Water Resources ka la shah wiang ding katba dang pynieng ha phyllaw jong kane ka ophis, la ïathuh ki Pulit.
Na ka jingbamduh jong ki thylliej ding kane kali ka julor. La suba ba ki runar ki la kawang da u petrol bomb, la ïathuh shuh shuh ki Pulit.
Ki Pulit ki la register case halor kane ka jingjia bad ki Pulit ki la pynlong ka jingthwet kaba jur ban ïohkem ïa kiba donkti.
Ha ka miet sngi Balang la ïoh jingtip ba ki runar ki la kawang Petrol Bomb ha ka ktem sah ki Pulit Central Reserve Police Force (CRPF).
U Superintendent of Police ka East Khasi Hills Rituraj Ravi ha ka jingïakren bad ki lad pathai khubor ha ka sngi Palei u la ïathuh ba watla ki Pulit kim shym la ïoh pdiang ïa ka jingujor hynrei ki la lap ïa ki lyngkhot bilor ba la pait harud surok bad la pynlong ïa ka jingtohkit.
Katkum ka jingïathuh jong u SP, haduh mynta ki don ym duna ïa ka hynñiew tylli ki jingjia kawang petrol bomb ha kylleng ka sor Shillong. “Ka jingtohkit ka la ïaid shakhmat bad ngin pynthikna ba ki nongkam bymman kin ngat ha ki kynjri jong ka aiñ,” la ong u SP.
Mynta ka taiew, ki runar ki la kawang petrol bom hakhmat ka Shillong Sadar Police Station bad ha Rynjah Police Station. Ym tang katta, ki runar ki la kawang petrol bom ruh ïa ki kali ba la pynieng ha phyllaw jong ka ophis Meghalaya Government Construction Corporation Limited (MGCC) ha Rilbong. Ki kali ki la shu lait thaw na ka jingkem ding namarba u petrol bom um shym la bthei.
Shwa kane, ki runar ki la kawang petrol bom ïa ki kali ba la pynieng ha Jowai Police Reserve ha kaba kawei ka kali Gypsy jong u nongtrei ka la ingkhong katba kawei ka kali Pulit ka la shu julor tang na ki bynta ba shakhmat.
Tang hapoh u bnai Iaiong haduh mynta ki jingshah kawang petrol bomb ki la jia ha Mawlai Police Station, nangta ia ka kali ba synran jong u Director (Personel) ka NEEPCO ha Demthring, ka jingshah kawang petrol bom ka iingsah u Symbud Myntri Rangbah ka Jylla Bah Sniawbhalang Dhar ha Nongmynsong.
Haduh mynta, ki Pulit kim shym la ïohkem satia ki briew kiba donkti ban kawang petrol bom kylleng ka sor Shillong ïa ki ophis treikam ka Sorkar.
“Ngi la rejistar ejahar bad ka jingtohkit ka la ïaid shakhmat. Watla kam pat don kano kano ka jingjulor ne ka jingmynsaw,” la ong u SP.
U SP u la ïathuh ba ka tnat Pulit ka la pynkhlaiñ ïa ka jingïaid pahara kylleng ka Sor Shillong ha ka por mynmiet khnang ban pynneh ïa ka shongsuk shongsaiñ.
