Shillong, Naitung 04: Ki Pulit ka Anti-Narcotic Task Force (ANTF) East Khasi Hills District ha ka sngi Palei ki la ïohkem hynriew ngut ki suba nong khaii drok na ka shnong Mawiong, Shillong kaba hap hapoh ka Mawlai Police Station.
Ha u kyrwoh ba la phah sha ki lad pathai khubor da u Superintendent of Police ka East Khasi Hills District, ki hynriew ngut kiba la shah kem ki dei kiba la tip kyrteng kum u Shanborlang Khongwir, 32 snem ka rta uba sah ha Mawlai Mawiong, u Bringson Kharumlong, 35 snem ka rta uba sah ha Mawlai Mawtawar, u Kitboklang Nongsiej, 29 snem ka rta uba sah ha Mawlai Umrynjah, u Return Dhar uba la 40 snem ka rta uba sah ha Mawlai Nongmali-III, u Wanlambok Lyngdoh, 25 snem ka rta uba sah ha Mawpat bad u Richard Marbaniang 24 snem ka rta uba sah ha New Nongstoiñ.
Na kine ki hynriew ngut ki Pulit ki la ïoh kurup san synduk u drok uba khia 64.1 gram, hynñiew tylli ki mobile phone, T. 1,29,000 lak ka pisa, kawei ka kali Maruti car 800 kaba don ïa u nombar ML 05 E 8363 bad kawei ka thuk thuk Yamaha R15 bike kaba don ïa u nombar ML05 AC 9261.
