Nongpoh, Lber 12: Ki Pulit ka East Khasi Hills bad ki Pulit jong ka Ri Bhoi District ki la lah ban pynpulom ïa ka jingthmu jong ki suba dkhot Hynñiewtrep National Liberation Council (HNLC) ban pynbthei sa uwei u bom IED ha Nongpoh hadien ba ki Pulit ki la ioh kem ïa ki saw ngut ki briew ba la suba ba ki dei ki nongkyrshan barieh jong ka HNLC.
Ki saw ngut kiba la shah kem ha ki Pulit ki kynthup ïa u Damanbha Ripnar ba ju khot sin u Shall Lapang, u Robinis Ripnar, u Jill Tariang bad u Shining Nongrum bad baroh kine kiba la shah kem ki dei kiba na Ri Bhoi District.
Kum ban pynkynmaw, ha ka sngi Saitjaiñ ka taiew baladep, u bom IED uba khlaiñbor bha u la bthei ha Them Iewmawlong, Shillong. Tang hapoh arphew saw kynta, ki Pulit ka East Khasi Hills ki la kem ia u Disciplinary Secretary jong ka Hynñiewtrep National Youth Front u Bah Tarson Lymba na Dawki bad ia u Bah Ebakordor Nongpluh na Mawlai, Shillong.
U Superintendent of Police ka Ribhoi District Jagpal Singh Dhanoa ha u kyrrwoh ba la phah sha ki lad pathai khubor ula iathuh ba ki Pulit jong ka East Khasi Hills bad Ri Bhoi ha ka lah sngi U Blei kumba ha ka por 6:00 baje janmiet ki la ioh bat ïa kawei ka kali Bolero Pick-up kaba don ïa u nombar ML-12-3243 ba la ñiah da u Bah Damanbha Ripnar na surok Usmning-Mawhati. Ha ka jingtalasi ïa ka Kali la ioh kurup ïa u bom IED lyngba ka kynhun Bomb Detection & Disposal Squad na Shillong ba la leh ha kata ka rukom ban lait na ki jingma jingmynsaw.
La ïathuh ruh ba ka kynhun ki saw ngut ki nongkyrshan barieh jong ka HNLC ki la shah kem da ka jingthmu ban pynbthei ïa u bom IED ha Shillong bad Nongpoh. Ki Pulit ki la iathuh ba kine ki saw ngut ki la phla ba ki la thmu leh da ka jingbthah jong ka seng HNLC na Bangladesh.
Ha ka jingiohkem ïa kine ki suba nongkyrshan barieh ka HNLC ki Pulit ki la ioh ban kurup 15 tylli ki Gelatin Sticks, 167 tylli ki nar lyngkhot (ba ju thep hapoh u bom IED, uwei u Safety Fuse Wire, 3 tylli ki Non Electric Detonator, 5 tylli ki Mobile Phone, ka Bolero Pick-up kaba don ïa u number ML-12-3243.
Halor kane ka jingioh kurup ia ki tiar pynbthei bad ka jing iohkem ïa kine ki 4 ngut, ki Pulit ka Ri Bhoi ki la register case ha Nongpoh Police Station da kaba pynngat hapoh ki kyndon jong ka Section 120 B/121 A Indian Penal Code (IPC), pule lang ruh bad ka Section 10/13/18 UA(P) Act bad ka 5/6 Explosive Substance Act.
