Shillong, Lber 12: Tang shi sngi hadien ba ka Sorkar India ka la pynmih paidbah ia ka Rule jong ka Citizenship Amendment Act, 2019, ka North East Students Organisation (NESO) kaba long ka shatri jong ki sengbhalang bapher bapher ka thain Shatei Lammihngi ha ka sngi Baar ka la thang ia ka Rule jong kane ka ain hakhmat ka ophis treikam jong ka Meghalaya Board of School Education (MBoSE) ha Lower Lachaumiere, Shillong.
La lamkhmat ban thang ia kane ka Rule da u Chairman jong ka NESO u Bah Samuel B Jyrwa ryngkat ka jingsynran lang jong ki nongialam ka Khasi Students Union (KSU), ki dkhot jong ka Federation of Khasi Jaintia and Garo Peoples (FKJGP) bad kiwei kiwei.
“Lada ka Assam ka shah ktah suki suki kiwei ki bynta jong ka thaiñ Shatei Lammihngi baroh kawei kin shah ktah. Lada phi ong ba ngi don ia ka Sixth Schedule ha kane ka jylla, kumno pat ka jingjyllei jong ki bar jylla ka jur haduh katne katne. Ka Sixth Schedule katkum ka jingiohi jong ngi ka khlem lah ban iada ia ka jingrung jong ki bar jylla bad kiba bun ki bynta jong ka Sor Shillong bad ki bynta jong ka khappud jong ka jylla la bun da kiwei pat ki jaidbynriew. Lada kata ka Sixth Schedule ka lah ban iada, balei pat kam lah ban iada baroh shikatta. Dei halor kata ka nongrim ba ngi sngew ba ka CAA kan nang pynshlur shuh shuh ia ki mynder ri ba kin wan shapoh ka ri jong ngi,” ong u Bah Samuel ha ka jingiakren bad ki lad pathai khubor.
“Naduh u snem 1947 ba ka ri India ka la ioh ia ka jinglaitluid ka thaiñ Shatei Lammihngi ka la iai shah ba ki bar ri kin wan buhai shnong bad shong shnong bad kumjuh ruh ha u snem 1971 haba la khie ka thma ha ri Bangladesh da ki phew hajar bad da ki lak ki la rung shapoh ka thaiñ Shatei Lammihngi,” u la ong.
“Ka Sorkar India da kaba leh kumne ka nang kwah shuh shuh ba ki bar ri kin long ki trai shnong, ki trai ri trai muluk hangne ha ka thaiñ Shatei Lammihngi baroh kawei, kaba long ka jingma ia ngi ki ritpaid ym tang ha ka jylla Meghalaya hynrei ha ka thaiñ Shatei Lammihngi baroh kawei,” la bynrap u Chairman ka NESO.
Kum ban shu pyntip hangne ba ka NESO ka la mudui hapoh ka Iingbishar Supreme Court pyrshah ia ka jingpynlong aiñ ia ka CAA bad haduh mynta kane ka kam ka dang sah pohding hapoh ka Ingbishar.
Haba kylli u la ong, “ka Sixth Schedule ka kren tang ia ka riti ka dustur, ka jingpynneh ia ka khyndew ka shyiap hynrei ka khlem kren ia ka jingrung jong ki briew kiba nabar. Dei namarkata, ka Sixth Schedule kam pat biang kumba ka long mynta ban tehlakam ia ka jingwan rung jong ki briew kiba nabar.”
“Ka jinglah ban tehlakam ia ka jingwanrung jong ki briew kiba nabar ka dei ka Sorkar Jylla bad ka Sorkar Pdeng. Kumba ka long mynta ka jingpyntreikam ia ka Meghalaya Residents Safety and Security Act (MRSSA) ka Ingbishar High Court ka la pynsangeh bad ia ka ILP ruh ka Sorkar India ka khlem ai nalor ba la iai dawa mynta da ki phew phew snem,” la ong shuh shuh u Bah Jyrwa.
Halor ka jingpynslem jong ka Sorkar India ban ai jingmynjur ia ka Inner Line Permit ha Meghalaya, u Bah Jyrwa u la ong, “ka jingiajngai jong ki jaidbynriew ritpaid ka thaiñ Shatei Lammihngi naduh mynshwa na ka ri India ka dei ka jingleh jong ki hi naduh ka por ba ngi ioh ia ka jinglaitluid ngi khlem ioh ia ka hok jong ki jylla ka thaiñ Shatei Lammihngi. Naduh ka sngi ba la ioh laitluid haduh kane ka khyllimat ba mynta kaei kaba ka Sorkar India ka la leh ia kaba bha ka ban long ka jingiada, ka jingkyntiew ia ka ktien ka thylliej, ia ka riti ka dustur bad ban iada ia ki jaidbynriew jong ka thaiñ Shatei Lammihngi baroh kawei, tang kawei ruh kam pat don ba kan leh. Kumno ngin ong ba ka Sorkar India ka la leh bha, ka khlem leh eiei ruh em. Dei halor kane ba kane ka jingpynjngai da nang jur nang jur hapdeng ki trai ri trai muluk ka thaiñ Shatei Lammihngi bad ka Sorkar India hapoh Delhi.”
