Shilllong, Nailur, 20: Uwei u dkhot ba la pyndem wait jong ka seng kieng atiar Hynniewtrep National Liberation Council u la shah kem ha ki Pulit ha ka miet sngi Palei ka 19 tarik Nailur, 2024 halor ka jingdonkti ban dawa pisa na ki heh saipan hadien ba la sam ia ki shithi dawa pisa jong ka HNLC.
Ia une u dkhot ba la pyndem wait jong ka seng HNLC la tip kyrteng kum u Sromwell Mawdoh uba la 41 snem ka rta la kem na iing sah jong u na ka shnong Umpling Dongsharum kaba hap hapoh ka Rynjah Police Station.
Ka khubor ba la iohlum na ki Pulit ka iathuh ba u Sromwell mawdoh watla u la dei u dkhot ba la pyndem wait hynrei u dang donkti ban trei kum u nongkyrshan jong ka seng HNLC na ka bynta ban lum pisa bad namar ka jingdonkti halor kane ka kam, u la shah kem ha ki pulit jong ka Ribhoi District kiba la buddien bha halor ka jingshah dawa pisa jong ki katto katne ki riewpaidbah.
Halor kane ka jingjia, ki Pulit ki la register case pyrshah ia ka jingsam shithi dawa pisa da ka seng HNLC sha ki nongkhaii heh spah kiba shong basah ha nongbah Shillong.
U Sromwell Mawdoh u dei uba la wan pyndem wait hakhmat ki Pulit jong ka East Khasi Hills District la katto katne snem mynshwa.
