Shillong, Nailar 24 : Ka Deputy Commissioner cum Chairman District Rural Development Agency, East Khasi Hills District Shillong ka la pyntip ba kum shibynta na ka jingthmu jong ka Sorkar India ban ai jingiarap ia ki 20,535 ngut ki nongshongshnong kiba don kyrteng ban ioh jingmyntoi lyngba ka bhah jong ka skhim shna ïng PMAY-G, bad ba yn lah ban pyllait noh ia ka pisa sha baroh ki nongioh skhim (beneficiaries) khnang ba kin lah ban pyndep noh ia ka jingshna ia ki ïng jong ki hapoh u bnai Lber (March 2024).
Ka DC ka la kyrpad ia baroh ki nongpyniaid shnong jong ki Shnong kiba hap hapoh ka East Khasi Hills District, khamtam kito ki shnong ha Nongkyndong, ba kin shim ia ka thup (list) jong ki nongioh skhim (beneficiary) ka shnong jong kiba ioh ia kane ka skhim na ki Block Office (BDO) bad ba kidei ban pynbiang ia ki Bank Account, ki Aadhaar card bad ban pyntikna ruh ba kin pyniasoh (Link) ia u Aadhaar nomber bad ki Bank account jong ki ha ki bank ba ki don, khnang ba kan ym don kano kano ka jingthut ynda la pyllait ia ka Pisa sha ki account jong ki khnang ba kin lah ban shna pyndep ia ki ïng jong ki ha ka por ba lah buh.
