U Superitendent of Police City u bah Vivek Syiem u la phah ia ka kyrwoh khubor ba ha ka 16 tarik u Jymmang ki pulit ki la ioh jingujor ba u don u briew uba kam ialade kum u ophisar jong ka tnat IB ka sorkar India uba thok pisa na ki paidbah da kaba thong ban ai kam ia ki ha Secretariat. U la bam ei ia ka pisa jong ki 38 ngut ki briew haduh 80 lak tyngka hynrei u khlem lah ban ai kam ia ki.
Ka kyrwoh ka la ong ba ka don ruh ka ejahar ha Lumdiengjri Police Station pyrshah ia une u juh u briew bad ha kata ka ejahar la ong ba u la thong ban ai kam pulit ia ki samla bad ki bym pat lait ia ka Matrik ki hap ban siew shi lak tyngka bad kiba la pyndep ia ka matrik kin hap siew ha u San phew hajar tyngka. U nongujor u la pyntip ha ki pulit ba u la dep ban ai ia ka pisa 50 hajar tyngka ha u nongniah kali jong u ha Motphran.
Utei u briew uba leh mynleh ialade kum u IB Ophisar u dei uba la tip kyrteng kum u Richard Tiplang Swer (39 snem ka rta), ki pulit ki la ioh kurup ia ka Bolero kaba don siren bad ka light VIP kane ka Bolero ka dei kaba don ia u Registeration nombar ML-05 Z 3007, ki la ioh kurup ruh ia ka laptop, ka mobile phone bad ki kot ki sla na iing sah jong u na Wahingdoh. La rejistar Case ha Mawlai Police Station bad la pynngat ha ki kyndon C/No. 45(05)2023 u/s 419/420 IPC r/w 66D IT Act and Lumdiengjri PS C/No. 71(05)2023 u/s 419/420 IPC.
