Shillong, Lber 02: Ki Pulit jong ka East Khasi Hills District ha ka sngi saitjaiñ ki la iathuh ba ki la kem ia u Bah Storgy Lyngdoh uba dei u dkhot jong ka seng kieng atiar ba la shah khein beain ka Hynñiewtrep National Liberation Council (HNLC) halor ka jingdonkti jong u ban sam ia ki shithi dawa ban lum pisa na ka bynta ka HNLC na ki nongkhaii heh saipan ka nongbah Shillong.
Ha u kyrwoh ba la phah da u Superintendent of Police (SP) ka East Khasi Hills u Rituraj Ravi sha ki lad pathai khubor u la iathuh ba ki Pulit ki la ioh jingtip ha ka sngi thohdieng ba u Bah Storgy Lyngdoh u dei uba donkti ban sam ia ki shithi dawa pisa sha ki heh saipan ka nongbah Shillong.
U SP u la iathuh ba katkum ka jingioh lum jingtip la ngeit ba u Bah Storgy u lah ban pyntieng kohtympan bad byrngem ruh ia ki nongkhaii heh saipan ba kin pdiang ia ki shithi dawa pisa. Ha ka jingbuddien jong ka tnat syntiat, la lap ba u Bah Storgy u shong u sah ha ka shnong Mawlynrei, Khliehshnong, Shillong.
Shuh shuh u SP u la iathuh, hadien ba la ioh jingtip halor kane, ki Pulit jong ka East Khasi Hills ki la kem ia u Bah Storgy Lyngdoh na ka shnong Mawlynrei ha ka step sngi saitjain bad ioh kurup ruh ia kawei ka Bangladeshi SIM card na u.
Katkum une u kyrwoh, u SP u la pyntip ba u Bah Storgy Lyngdoh u dei u dkhot jong ka HNLC bad uba don ruh ka jingiadei kaba iajan bha bad u Deputy Commander-in-Chief jong ka HNLC bad u dei ruh u PSO jong u A. Hazarika ba ju khot sin kum u Manbhalang Jyrwa, uba dei u Vice Chairman barim jong ka HNLC.
Ha kaba iadei bad kane, ia ka ejahar la rejistar ha Rynjah Police Station na ka bynta ban pynlong shuh shuh ia ka jingtohkit kaba bniah halor kane ka kam. Katkum ka jinglum jingtip jong ka tnat Pulit ka Jylla Meghalaya, u Bah Storgy u dei uba donkti ha kiba bun ki kam runar bad uba la lait ruh da ka said na ka jingshah kem ha ki bor jong ka ain, la pyntip shuh shuh u SP.
Ha ka por janmiet, ki Pulit ki la tian bishar ia u Bah Storgy ha kashari District and Session Judge, Shillong bad ka Kashari ka la aibor 10 sngi ia ki Pulit ban tohkit pyrshah ia u Bah Storgy Lyngdoh.
