Shillong, Jylliew 27: Ar tylli ki kali rit kiba dei ruh ki kali shimet bad kawei ka kali Bolero Camper kiba ju pyndonkam da ki nongtrei jong ka Joint Stock Industrial Association Vozrozhdenie (JSIAV) kaba dei ka kompeni kaba dang pyntrei ïa ka surok Nongstoiñ-Wahkaji ki la ïingkhong na ka jingshah wiang ding ha ka step sngi Palei ha ka jaka sah jong ki nongtrei jong ka Kompeni kaba don ha ka shnong Ladweitang, Nongstoiñ, West Khasi Hills Distirct.
Katkum ka jingïathuh jong u Manager ka JSIAV, la ong ba kane ka la jia ha ka por kumba 4:00 baje mynstep ha kaba ki nongtrei ki shu ïohsngew tang ïa ka jingpah jong ki kali kiba la shah wiang ding bad u la ïathuh ruh ba ki la don ki nongtrei kiba la pyntip mar mar ïa u sa kawei ka kali puhshilum kaba don ha ka surok Nongstoiñ-Mawkyrwat hajan ka jingkieng Kynroh ka la shah wiang ding.
U Manager u la ïathuh ruh ba ka jingjulor jong ki kali ha kane ka jingshah wiangding ka la kot palat klur tyngka bad na ka liang jong ka kompeni ka ladep ujor da ka ejahar ha Nongstoiñ Police Station.
