Shillong, ïaïong 05: Ka Kashari jong u District and Session Judge, West Jaintia Hills District ha ka 3 tarik mynta u bnai ka la rai pynrem ban set along shi rta jingim ia ki ar ngut ki nongpyniap briew. Kine ki dei kiba la tip kyrteng kum u Salbinal Nangbah bad u Belting Tyngkra.
Ha ka 6 tarik, Jymmang, 2014, ki bahaing hasem ki la ujor da ka ejahar ha Nartiang PIC halor ka jingshah pyniap jong u Bah Prodic Nangbah ha ki lai ngut ki briew kiba la tip kyrteng kum u Chalbinal Nangbah, u Salbinal Nangbah bad u Belting Tyngkra. Ia ka case la reistar ha Jowai Police Station hapoh ka Section 302/34 IPC bad ia ka jingtohkit bad ka jingpynngat kyndon la leh da u SI C. Lamare.
Hadien shiphew snem ka jingiakhun ban ioh ia ka hok ka Kashari jong u District and Sessions Judge, ka West Jaintia Hills District, Jowai ka la rai pynrem ban set along shi rta jingim ia u Salbinal Nangbah bad ia u Belting Tyngkra na ka shnong Mynkrem bad dain kuna T. 5000 hajar marwei halor ka jingdonkti ban dkhat jubor ia ka jingim jong u Prodic Nangbah na ka shnong Mynkrem ha u Jymmang, 2014.
Katba ka jingbishar ka dang iaid, uwei na kiba la shah mudui uba la tip kyrteng kum u Chalbinal Nangbah ula khladnoh ha ka 6 tarik, iaiong, 2017.
Ka Kashari ka la hukum ban siew bailutksan T. 300,000 lak sha ki bahaing hasem jong u lanot uba la shah pyniap.
