Shillong, ïaïong, 03: Ka Kashari jong u Session Judge, ka West Jaintia Hills District ha ka 28 tarik, Lber, 2024 ka la rai pynrem ia u Aloi Suiam da kaba phah set along shi jingim hadien ba la lap ia ki sakhi ki sabut kiba biang ba u dei uba donkti ban pyniap briew ha ka shnong Saphai ha ka 29 tarik, Nailur, 2005.
Katkum u kyrwoh ba la phah da u Superintendent of PoliceWest Jaiñtia Hills u la pyntip ba ha ka 6 tarik, Nailur, 2005 ki Pulit ki la ioh pdiang ia ka ejahar ba la mudui da u (L) Linus Sumer u kpa jong uba shah pyniap u (L) Rishanki Biam halor ka jingkynnoh ba u Aloi Suiam u la pyniap ia u khun jong u ha ka 29 tarik, Nailur 2005 ha ka shnong Saphai.
Ia ka case la rejistar ha Jowai Police Station hapoh ka Section 302 Indian Penal Code (IPC) bad ia ka jingtohkit la bynshet ha u SI B Singh.
Khatduh iawai, ha ka 28 tarik, Lber, 2024 ka Kashari jong u Sessions Judge, West Jaintia Hills District, halor ka jingpdiang ia ki sakhi sabut, ka la lap ba u Aloi Suiam u dei uba donkti ban pyniap briew bad pynngat ia u hapoh ka Section 302 IPC na ka bynta ban set along shi rta jingim.
Ka Kashari ka la hukum ruh ia u Aloi Suiam ban siew ia ka bailutksan kaba T. 300,000 lak sha ka ing ka sem jong u lanot.
