Shillong, ïaïong, 03: Ka Sengbah ki Nongshat Nongkheiñ ka Bri Hynñiewtrep u Hynñiewskum hakhmat ka longhok ba tynrai ha ka sngi Balang ka la pynlong ia ka nguh Blei ka dem Blei kaba shi sien shi snem ha ka shlem treikam kaba don ha ka shong Bañiun, Upper Shillong.
Katkum ka jingiakren bad u dkhot ka seng u Rgh Teibor Roy Khonglam ba la seng ia ka Sengbah ki Nongshat Nongkhein ha ka 21 tarik, Naiwieng 1982 bad ka nguh Blei ka Dem Blei kaba mynta ka sngi, ka dei pat kaba ha kum kane ka sngi ha u snem 1983 ba ka Sengbah ka shim ia ka sien jam ban pynlong ia la ka nguh Blei dem Blei kaba nyngkong eh jong ka.
Nalorkata u Rgh Teibor u la pyntip ba ka Sengbah ka ju pynlong ruh ia ka ksan rngiew ia ki riew tymmen riewsan.
Haba iadei bad ka nguh Blei dem Blei kaba mynta ka sngi, la ju sdang nyngkong da ka suit lama, kaba long kum shibynta ka jingkhot ka jingpyrta ia ki Blei ba kin wan ban hiar, ba kin ai ia ka kyrkhu ka kyrdoh, khnang ba ka seng kan ioh ia ka bor Blei ban pyndep ia ki kam ki jam kumba la seng.
Kumta ha kane ka suit lama la pyndep ia ka niam ka rukom da u President u Rgh Pranshon Jala da kaba u la iapan nakhmat u Kynrad ia ka kular ka jutang kaba hok, khnang ba kan neh kan skhem ka jutang hapdeng u briew bad u Blei.
Hadien ba la dep ka nguh ka dem ka ladei pat ka pali ban pynher ia ka lama jong ka seng ba la kyntiew da u Treasurer ka Sengbah u Dr M. Blah.
Ka bynta kaba ar ka dei ka knia ka khriam halor ka duwan ka dupat, kaba hangne la pyndonkam ia artylli ki syiar kawei dei ka syiar kynthei bad sa uwei pat dei u syiar shynrang. Ia ka syiar kynthei la pyndonkam ban nguh ban dem ia ka meiramew ban khot ban pyrta ia ki Blei ba kin wan ryngkat bad hangne ruh ia ka lehniam lem bad ia ka jingknia manla u snem la pyndep da u President.
Hadien kane u Vice President ka Sengbah u la shim pat ia ka bynta ban pyndep ia ka knia ka khriam sa ha u syiar shynrang kaba long kum ka dak ka nguh ka dem ia ki ryngkew ki basa, ba long ki nongker ki nongda ne kum ki shipai Blei kiba ker ba da ia u khun bynriew na baroh kiei kiei kiba thmu ban wan pynjot ban pynsniew ia u khun bynriew.
Nalor kane la pynbud pat sa ia ka dwai um kaba mut ka jingpynshong Blei pat ia ka um bad ia kane ka kam la pyndep ia ka da u Organising Secretary ia kaba la ju sam paidbah ruh ba kin ioh ban rah rneng pat sha la iing ban pyndokam kum ban sum ban sleh ban sait ban khlieng bad dih ban bam, bud pat sa ka jingdwai khaw ne ka jingpynshong Blei ia u ban ioh ban ia bam khyndiat khynsoit u ban long u khaw eh u khaw khlain ban ia rah sha la iing bad ban ia thep ha la i pla ban long kum u nongiada ia u khun bynriew.
Ka khubor kaba u Rgh Teibor u kwah ban sam lem sha ki parakur ki kur parakha kiba dang bat dang ksoh rydin ha la ka niam hok kaba tynrai hi ka long kumba ka kyntien kaba ong ka hok kaba tam, kaba kum ka Sengbah ka ju kwah ba kane ka thong kan janai ha la ka jong bad bym dei ruh ruh ban klet ia la ka jong ka tynrai namar hangne shong ka hok.
