U Myntri Rangbah ka Jylla u Conrad Kongkal Sangma u la leit ban ia shim bynta lang ha ka jingplie ia ka ïing Dorbar Bah ka Ri kaba la plie da u Myntri Rangbah Duh ka Ri u Narendra Modi ha ka 28 tarik u Jymmang, 2023. Katei ka iing dorbar bah ba thymmai ka lah ban ngiam haduh 888 ngut ki dkhot jong ka Lok Sabha .
“Kum uwei na kiba ioh ban sakhi lang ia kane ka sngi ba khraw, nga dap da ka jingkmen halor ka jinglah jong ka Ri jong ngi. U nongialam jong ngi, u PA Sangma uba dei ruh u Lamphang barim ka Lok Sabha, u la ju iohi lypa ia ka thain shatei lam mihngi ba kan don lang ryngkat ryngkat bad kiwei pat ki bynta jong ka Ri. Mynta ka sngi, nga sakhi ia ka jingplie ia kane ka projek sahnam, nga kynmaw ia ka jingiohi jngai bad ruh ia ka jingpyrshang borbah jong u. Ka jingangnud jong ka ri jong ngi ia ka synshar ba laitluid bad kaba kdup ia ka lawei kaba phyrnai ka la phalang lypa da kane ka Parliament ba thymmai. Ka dei ka jutang ia ka lynti iaid jong ka India bad ruh ka jingskhem jong ka ban ai ia ka synshar khadar kaba long salonsar ia baroh”,ong u Conrad Sangma.
